कैलाली — लागूऔषध नियन्त्रणको क्रममा कैलालीका विभिन्न स्थानबाट ४ जना युवालाई प्रहरीले खैरो हेरोइनसहित पक्राउ गरेको छ।
जिल्ला प्रहरी कार्यालय कैलालीका अनुसार धनगढी उपमहानगरपालिका–३ त्रिनगर पोष्टबाट डोटीको दिपायल सिलगढी नगरपालिका–३ निवासी १९ वर्षीय दिपेन्द्र नेपालीलाई पक्राउ गरिएको हो। उनलाई चेकजाँच गर्दा १ ग्राम ७१० मिलिग्राम लागूऔषध खैरो हेरोइन फेला परेको प्रहरीले जनाएको छ।
यस्तै धनगढी उपमहानगरपालिका–१० सिमलघाटबाट भारत लखिमपुर खिरी सुडा निवासी २५ वर्षीय कल्लु राना १ ग्राम ४३० मिलिग्राम खैरो हेरोइनसहित पक्राउ परेका छन्।
त्यसैगरी जानकी गाउँपालिका–४ बेलपुरबाट सोही ठाउँका २५ वर्षीय निरज कठरिया र २० वर्षीय अमन बडायकलाई २ ग्राम ३१० मिलिग्राम लागूऔषधसहित नियन्त्रणमा लिइएको छ।
पक्राउ परेका चारै जनामाथि लागूऔषध सम्बन्धी आवश्यक अनुसन्धान भइरहेको जिल्ला प्रहरी कार्यालय कैलालीले जनाएको छ।
