कैलालीको टीकापुरमा एक शिक्षकको शंकास्पद अवस्थामा मृत्यु भएको छ। जानकी गाउँपालिका–४ स्थित जनता नमुना माध्यमिक विद्यालयमा कार्यरत धनगढी उपमहानगरपालिका–५ तारानगरका ४५ वर्षीय शिक्षक जगदीश पन्तको शनिबार राति निधन भएको हो।
पन्त टीकापुरस्थित लोकल स्टेशन होटलमा खाजा खाइरहेका बेला अचानक बेहोस भएका थिए। उनलाई तत्काल उपचारका लागि टीकापुर अस्पताल लगिएको थियो तर चिकित्सकले उनलाई मृत घोषित गरेका हुन्।
इलाका प्रहरी कार्यालय टीकापुरका प्रमुख प्रहरी नायब उपरीक्षक नवीनराजा बुढाथोकीका अनुसार घटनामा शंका लागेकाले सोही होटलमा पन्तसँगै खाजा खाइरहेका तीन जनालाई पक्राउ गरिएको छ।
प्रहरीले पेयपदार्थमा विषादी मिसाइएको हुनसक्ने आशंकामा अनुसन्धान अगाडि बढाएको जनाएको छ।
अहिले मृतकको शव परीक्षणका लागि अस्पतालमा राखिएको छ भने अनुसन्धान जारी रहेको प्रहरी स्रोतले जनाएको छ।
