कपिलवस्तु – कपिलवस्तुको महाराजगञ्ज नगरपालिका–२ मा सर्पले डसेर १४ महिनाकी बालिकाको ज्यान गएको छ। झगरु पासवानकी छोरी संगीता पासवानलाई घरमै सुतेको अवस्थामा सर्पले डसेको थियो।
सर्पले डसेपछि केही बेरमै अचेत भएकी बालिकालाई तत्काल बहादुरगञ्ज अस्पताल लगिएको थियो। तर, त्यहाँ उपचार हुन नसकेपछि गोरुसिङ्गेस्थित सर्पदंश उपचार केन्द्रमा लगिएको थियो।
तर, उपचारमा ढिलाइ हुँदा संगीता पासवानको बाटोमै मृत्यु भएको सर्पदंश उपचार केन्द्र गोरुसिङ्गेका व्यवस्थापक नवीन भण्डारीले जानकारी दिए।
स्थानीय स्तरमा विषालु जनावरसँग जुध्न आवश्यक चेतना र स्वास्थ्य पूर्वतयारीको अभावले बालबालिकासहित सर्वसाधारणको जीवन जोखिममा परेको भन्दै स्थानीयले चिन्ता व्यक्त गरेका छन्।
