काठमाडौं – राष्ट्रिय स्वतन्त्र पार्टी (रास्वपा) ले पार्टी सभापति रवि लामिछानेको समर्थनमा देशव्यापी रूपमा हस्ताक्षर अभियान सञ्चालन गरिरहेको छ। बिहीबार काठमाडौंको बनस्थलीस्थित पार्टी कार्यालयमा आयोजित पत्रकार सम्मेलनमार्फत रास्वपाले हालसम्म २४ लाख ५७ हजार ६१८ जनाले अभियानमा हस्ताक्षर गरिसकेको जानकारी दिएको हो।
रास्वपाले लामिछानेमाथि लागेको संगठित सहकारी ठगी प्रकरणमा राज्यले राजनीतिक प्रतिशोध साँधिरहेको आरोप लगाउँदै ‘न्यायका लागि ऐक्यबद्धता’ अभियान सञ्चालन गरिरहेको छ।
पार्टीका नेता दीपक बोहराका अनुसार अभियान ७ असारदेखि सुरु गरिएको हो। हालसम्म प्रदेश, जिल्ला र पालिकास्तरमा सञ्चालन भएको यो अभियान अब साउन ५ गतेदेखि गाउँघरसम्म विस्तार गरिँदैछ। उनले घरदैलोमार्फत हस्ताक्षर संकलनको कार्यलाई जनस्तरसम्म पुर्याइने बताए।
साथै नेपाल–भारत सीमा नाकाहरू—काकडभिट्टा, रक्सौल, जोगवनी, बेलहिया, जमुनाह, गड्डाचौकी—लगायत विमानस्थल, बसपार्क तथा सार्वजनिक स्थलहरूमा ऐक्यबद्धता डेस्क स्थापना गरिने पनि रास्वपाले जनाएको छ। हालैको उपचुनाव तोकिएको रुपन्देही–३ का सबै ३६ वडामा बुथ खडा गरेर अभियान चलाइनेछ।
विदेशमा रहेका नेपालीहरूले समेत लामिछानेको पक्षमा ऐक्यबद्धता जनाउँदै हस्ताक्षर पठाइरहेका छन्। रास्वपाका अनुसार हालसम्म भर्चुअल माध्यमबाट मात्रै ७ लाख ९० हजार २३० जनाको हस्ताक्षर प्राप्त भएको छ।
प्रदेशअनुसार हस्ताक्षर संख्या यसप्रकार छ :
- बागमती: ६,३९,०८६
- गण्डकी: ४,३९,७२३
- लुम्बिनी: २,३६,५९५
- कोशी: १,६६,८६१
- सुदूरपश्चिम: ९४,५३५
- कर्णाली: ४३,७७५
- मधेश: २०,५०५
- केन्द्रीय कार्यालयबाट: ३३,३७०
अभियान सञ्चालनका क्रममा हालसम्म ४६ लाख १२ हजार ६३७ रुपैयाँ सहयोग प्राप्त भएको र ५९ लाख ६७ हजार रुपैयाँ खर्च भइसकेको पनि पार्टीले जनाएको छ। नेता बोहराका अनुसार अभियान घाटामा चलिरहेको छ।
रास्वपाले लामिछानेविरुद्धको मुद्दालाई राजनीतिक प्रकृतिको भएको दाबी गर्दै आम जनता, कलाकार, राजनीतिकर्मीहरूलाई साथ दिन आह्वान गरेको छ।
