धनगढी – धनगढीको जाइचोकस्थित गायत्री शक्तिपीठको पर्खालमा लेखिएको एक सन्देशले समाजमा गहिरो प्रभाव पारिरहेको छ।
सन्देश यस्तो छ:
“मानव मात्र एक समान, एकपिताकी सब सन्तान। जाति बंशको छैन महत्व, मानवता हो असली तत्व।”
यो केवल भित्ते लेखन होइन यो सन्देश हो वरिष्ठ पण्डित बलराम धामी साधकको जीवनदर्शन जो विगत ३८ वर्षदेखि जात–पातको भेदभाव नगरी सबै वर्ण, जात र वर्गका व्यक्तिहरूलाई समान श्रद्धा र सेवाभावका साथ धार्मिक संस्कार गर्दै आउनुभएको छ।
उहाँको मानवता केन्द्रित सोचको मूल प्रेरणा उहाँका गुरु तपोनिष्ठ पण्डित श्रीराम शर्मा आचार्यबाट आएको हो। पण्डित श्रीराम शर्मा आचार्यले ३२०० भन्दा बढी पुस्तकहरू लेखी वेद, उपनिषद्, योग, तान्त्र, ध्यानलगायतका विषयमा गहन अध्ययन गर्दै आध्यात्मिक ज्ञानलाई व्यवहारिक जीवनमा उतार्ने कार्य गर्नुभएको थियो। उहाँले स्थापन गरेका अखिल विश्व गायत्री परिवार र शांतिकुञ्ज, हरिद्वार आज विश्वभर मानव धर्म, सेवा र समताको सन्देश फैलाइरहेका छन्।
पण्डित बलराम धामी भन्नुहुन्छ “शास्त्रले कहिल्यै विभेद गरेको छैन, विभेद त मानिसको कुदृष्टिको परिणाम हो। मैले जीवनभर सबैलाई एउटै आत्माको रूपमा सेवा गरेको छु।”
उहाँले हवन, नामकरण, विवाह, उपनयन, श्राद्धदेखि अन्त्येष्टिसम्मका सबै धार्मिक कर्मकाण्डमा समान भावले सेवा गर्दै आउनुभएको छ। त्यसैले स्थानीय समुदायले गायत्री शक्तिपीठलाई आज जातीय समानताको प्रतीकस्थलका रूपमा लिन थालेका छन्।
स्थानीय बासिन्दा बताउँछन् “धामी साधकज्यूजस्ता व्यक्तित्वहरू समाजका मौन क्रान्तिकारी हुन्। उनीहरूले नाराभन्दा कर्ममार्फत परिवर्तन ल्याउँछन्।”
धर्मकै नाममा समाज विभाजित भइरहेको बेला बलराम धामी साधक र उनका गुरु पण्डित श्रीराम शर्मा आचार्यका विचारहरूले धर्मको मूल उद्देश्य, मानवता, समता र सेवा सम्झाइरहेका छन्।
यसैबीच गायत्री शक्तिपीठमा हालसम्म ५५ वटा पुरश्चरण सम्पन्न भइसकेको छ। शक्तिपीठमा बेलाबेलामा संस्कार शिरोमणि ज्योतिषाचार्य पण्डित गणेशप्रसाद पन्तज्यूको आगमन हुने गर्दछ। विशेष उल्लेखनीय कुरा के छ भने शक्तिपीठका वरिष्ठ पण्डित बलराम धामी साधकले नै पण्डित गणेशप्रसाद पन्तज्यूलाई विभिन्न धार्मिक र आध्यात्मिक विषयमा सल्लाह सुझाव तथा मार्गदर्शन प्रदान गर्नुहुन्छ। यहाँ उहाँको खानपान तथा विश्रामको पनि यथोचित व्यवस्था गरिने गरिएको छ।
