झापा — वैदिक धर्म, संस्कार र आध्यात्मिक शिक्षाको क्षेत्रमा २२ वर्ष ७ महिना ११ दिनको अनवरत साधनासँगै आचार्य शेर प्रसाद सिन्चुरीले पूर्वाञ्चलको धार्मिक इतिहासमा गहिरो छाप छोड्नुभएको छ। दलित समुदायभित्रैबाट उदाएर वैदिक साहित्य र सनातन परम्पराको संरक्षणमा जीवन समर्पण गर्नुभएका सिन्चुरीले श्रीमद्भागवत सप्ताह, शिवमहापुराण, विष्णुपुराण, गायत्री पुरश्चरण, महारुद्राभिषेक, शतचण्डी यज्ञलगायतका कैयौं धार्मिक अनुष्ठानहरू सफलतापूर्वक सञ्चालन गर्दै समाजमा धार्मिक चेतनाको पुनर्जागरण ल्याउनुभएको छ।
उहाँकै प्रेरणाले अमर प्रसाद लुहार ‘उपव्यास’का रूपमा प्रारम्भदेखि निरन्तर धर्मसेवामा जुटिरहनुभएको छ भने गोपाल घतानीले पनि जन्मदेखि मृत्युसम्मका विविध धार्मिक कर्ममा निःस्वार्थ भावले सक्रियता जनाउँदै आफ्नो जीवन धर्ममार्गमा समर्पित गर्दै आउनुभएको छ।
आचार्य सिन्चुरीले संस्कार शिरोमणि, ज्योतिषाचार्य पण्डित गणेश प्रसाद पन्तप्रति श्रद्धा व्यक्त गर्दै उहाँका वैदिक योजना र कार्यक्रमहरूमा सहयोग पुर्याउँदै आउनुभएको छ। वेद, संस्कृत, ज्योतिष, पञ्चाङ्ग र सांस्कृतिक पुनर्जागरणमा समर्पित पण्डित पन्तज्यूको मार्गदर्शनलाई सम्मान गर्दै सिन्चुरीज्यूले ज्ञानको सेतु निर्माणमा महत्वपूर्ण भूमिका निर्वाह गर्नुभएको छ।
त्यसैगरी विश्वकर्मा वैदिक गुरुकुल जस्ता धर्मसंस्थाहरूको संरक्षण र विकासमा समेत उहाँको योगदान उल्लेखनीय छ। गुरुकुलमार्फत वैदिक शिक्षा, संस्कार र सांस्कृतिक मूल्य–मान्यताको पुनर्स्थापनामा उहाँको सक्रियता धर्म, जातीय समानता र राष्ट्रिय संस्कृति सुदृढ बनाउने अभियानको जग बनेको छ।
निष्कर्षमा शेर प्रसाद सिन्चुरी, अमर प्रसाद लुहार र गोपाल घतानीको समर्पित धर्मयात्राले समाजमा उच्च र निम्न सबै वर्गबीच एकता र चेतनाको पुल बनाएको छ। यो २२ वर्षे अध्यात्मिक यात्राले धर्म, सेवा र समर्पणको नयाँ परिभाषा वर्तमान पुस्तालाई सिकाएको छ।
