ब्याङलोर — नेपाली कला, संस्कृति र पहिचानको संरक्षण तथा प्रवर्द्धन गर्ने उद्देश्यले स्थापना गरिएको सगरमाथा सांस्कृतिक कलाघर, ब्याङलोरले आफ्नो प्रथम वार्षिकोत्सव कार्यक्रम २०८२ साल श्रावण ११ गते (२०२५ जुलाई २७) शनिबार भव्य रूपमा सम्पन्न गरेको छ।
कार्यक्रमको अध्यक्षता संस्थाका अध्यक्ष दल बहादुर बोहराले गर्नुभएको थियो भने प्रमुख अतिथि सोनु साउद र विशिष्ट अतिथि जनकराज ढुंगानाको विशेष उपस्थिति रहेको थियो। उद्घाटन सत्र उक्त तीनै व्यक्तित्वहरूको संयुक्त उपस्थितिमा सम्पन्न भयो।
कार्यक्रममा सचिव पूजा छेत्रीले स्वागत मन्तव्य राख्नुभएको थियो भने सञ्चालनको जिम्मेवारी मंगल गुरूधामीले सम्हाल्नुभएको थियो। व्यवस्थापन पक्षमा उपाध्यक्ष नरेश भण्डारी, माया मगर, दिया बिष्ट र शलीना थापा सक्रिय थिए।
अतिथि सम्मानको कार्य पूजा बुढा छेत्री र रेखा बम शाहीले संयोजन गर्नुभएको थियो। स्वयंसेवकको नेतृत्व संस्थाका वरिष्ठ सदस्य टिएस खड्का ले गर्नु भएको थियो। कार्यक्रमको मुख्य आकर्षणका रूपमा आयोजित सांगीतिक प्रस्तुतिमा दिपेन्द्र शाही, दिनेश ताम्राकार, पुष्पा आचार्य, गोकर्ण खाती, चन्दा बोहरा, सरोज सरगम, रोमियो सुमन, मनिषा मगर, भरत खड्कालगायत कलाकारहरूले उत्कृष्ट प्रस्तुति दिँदै दर्शकलाई मन्त्रमुग्ध बनाएका थिए।
कार्यक्रममा हङकङमा रहनु भएकी संस्थाकी वरिष्ठ सदस्य सावित्री देवकोटालाई संस्थाका पदाधिकारीहरुले सम्मान ब्यक्त गरेका थिए। वार्षिकोत्सवले प्रवासी नेपालीबीच एकता, सद्भाव र सांस्कृतिक सम्बन्धलाई थप बलियो बनाएको आयोजकहरूको भनाइ छ।
कार्यक्रममा सहयोग गर्ने सबै अतिथि, कलाकार, स्वयंसेवक, दर्शक र शुभेच्छुकप्रति संस्थाले विशेष आभार प्रकट गरेको छ। संस्थाले आगामी दिनहरूमा अझ प्रभावशाली कार्यक्रमहरू गर्दै नेपाली कला र संस्कृतिको जगेर्नामा निरन्तर लागिरहने प्रतिबद्धता जनाएको छ।
