तेह्रथुम – सङ्खुवासभाको धर्मदेवी नगरपालिका–९ मुलगाउँबाट झापा दमकका लागि छुटेको यात्रुबाहक बस दुर्घटनामा परि १४ जना घाइते भएका छन्। दुर्घटनामा परेका घाइतेमध्ये एक जनाको अवस्था गम्भीर रहेको छ।
बा २ प ७२४४ नम्बरको उक्त बस तेह्रथुम र सङ्खुवासभाको सिमानामा पर्ने लालीगुराँस नगरपालिका–१ स्थित देउराली घुम्तीबाट करिब १० मिटर तल खसेको हो।
जिल्ला प्रहरी कार्यालय तेह्रथुमका प्रहरी नायब उपरीक्षक लीलाराज लामिछानेका अनुसार, दुर्घटना आज बिहान भएको हो। बस अनियन्त्रित भई घुम्तीमा सडकबाट तल खसेको जनाइएको छ।
दुर्घटनामा घाइते हुनेहरूमा धर्मदेवी नगरपालिका–९ का २३ वर्षीय सविन विष्ट, धर्मदेवी–७ का २५ वर्षीय भवानी कार्की, ७ वर्षीया असीमित भारती, ९ वर्षीया हिरा भारती, ५६ वर्षीया रत्नमाया कटुवाल, १२ वर्षीय विष्णु कटुवाल, मनकुमार कटुवाल, ५२ वर्षीया धनमाया चापागाईं, धर्मदेवी–६ का ५२ वर्षीय श्रीमान तामाङ, १५ वर्षीया प्रतिमा कटुवाल, १६ वर्षीया सोममाया याईम, ३० वर्षीय सुजन कटुवाल, ६२ वर्षीय दलबहादुर कार्की र धनकुटाको महालक्ष्मी नगरपालिका–१ का २४ वर्षीय विमल विक रहेका छन्।
घाइतेमध्ये सविन विष्टको अवस्था गम्भीर रहेको बताइएको छ। उनलाई थप उपचारका लागि बिपी कोइराला स्वास्थ्य विज्ञान प्रतिष्ठान धरान पठाइएको छ। अन्य घाइतेहरूको बसन्तपुर अस्पतालमा उपचार भइरहेको छ।
दुर्घटनापछि बस चालक खेम महत फरार भएको र उनको खोजी भइरहेको जिल्ला प्रहरी कार्यालय तेह्रथुमले जानकारी दिएको छ। दुर्घटनाको कारणबारे थप अनुसन्धान भइरहेको प्रहरीले जनाएको छ।
