रुपन्देहीमा मूर्ति विसर्जनका क्रममा तीन युवाको डुबेर मृत्यु

रुपन्देहीमा मूर्ति विसर्जन गर्ने क्रममा बुधबार तीन जना युवाको डुबेर मृत्यु भएको छ। गैडहवा गाउँपालिका–६ सूर्यपुराघाटमा मूर्ति सेलाउने क्रममा भएको दुर्घटनामा मायादेवी गाउँपालिका–१ का १३ वर्षीय अजय हरिजन, १५ वर्षीय दीपु हरिजन र २८ वर्षीय रोहित हरिजनको ज्यान गएको रुपन्देहीका प्रहरी प्रवक्ता सुरज कार्कीले जानकारी दिएका छन्।

बेपत्ता भएको सूचना पाएपछि प्रहरी र स्थानीयले खोजी गर्दा करिब २०० मिटर तल उनीहरूको शव फेला परेको प्रहरीले जनाएको छ। दानव र कञ्चन नदीको संगमस्थल सूर्यपुरास्थित सन्तेश्वर घाटमा दिउँसो करिब तीन बजे उनीहरू मूर्ति सेलाउन पुगेका थिए।

सोही स्थानमा छठ पर्वको तयारी पनि सुरु भइसकेको थियो। यसअघि पनि तिहारको समयमा गाउँका तीन युवाको डुबेर मृत्यु भएको स्थानीयले बताएका छन्। बुधबारको यो घटनापछि सूर्यपुरा र मायादेवी गाउँ शोकमा डुबेका छन्। स्थानीय सन्दीप गुप्ताका अनुसार गाउँमा शोकको वातावरण छ।