काठमाडौं – मध्यपश्चिम विश्वविद्यालय ले विद्यार्थी हितलाई मध्यनजर गर्दै परीक्षा तालिका संशोधन गरेको जनाएको छ । विश्वविद्यालयको केन्द्रीय कार्यालयद्वारा २०८३ जेठ ८ गते जारी सूचनाअनुसार बकर ईद (ईद-उल-अजहा) का कारण विद्यार्थीहरूलाई पर्न गएको समस्यालाई ध्यानमा राख्दै परीक्षा तालिका परिमार्जन गरिएको हो ।
यसअघि २०८३ जेठ ६ गते प्रतिनिधि सभाको बैठकमा सांसद समिना मिया ले मुस्लिम समुदायका विद्यार्थीहरूको समस्यालाई गम्भीर रूपमा उठाउँदै बकर ईदको समयमा परेका विभिन्न विश्वविद्यालय तथा शैक्षिक संस्थाका परीक्षा तालिका संशोधन गर्न सरकार तथा सम्बन्धित निकायको ध्यानाकर्षण गराएकी थिइन् ।
सांसद मियाले विद्यार्थीहरूको धार्मिक आस्था, भावना र अधिकारको सम्मान गर्नुपर्ने बताउँदै परीक्षा तालिका संशोधन आवश्यक रहेको धारणा राखेकी थिइन् । त्यसपछि विश्वविद्यालयले विद्यार्थी हितलाई प्राथमिकतामा राख्दै संशोधित परीक्षा तालिका सार्वजनिक गरेको जनाएको छ ।
मध्यपश्चिम विश्वविद्यालयले सांसद समिना मियाप्रति हार्दिक धन्यवाद व्यक्त गर्दै विद्यार्थीहरूको समस्यालाई समयमै उठाएकोमा प्रशंसा गरेको छ । विश्वविद्यालयले जनप्रतिनिधिको सकारात्मक पहलका कारण हजारौं विद्यार्थीलाई राहत र उत्साह मिलेको उल्लेख गरेको छ ।
विश्वविद्यालयद्वारा जारी सूचनामा संशोधित परीक्षा तालिका सम्बन्धित निकायमार्फत सार्वजनिक गरिएको जनाइएको छ ।
