कैलालीमा लागूऔषध कारोबारमा संलग्न दुई जना पक्राउ परेका छन्। प्राप्त सूचनाका आधारमा गौरीगंगा नगरपालिका–८ बडैपुर बजारमा गरिएको विशेष चेकजाँचका क्रममा सोही स्थानका ३० वर्षीय हरेन्द्र भाट पक्राउ परेका हुन्। प्रहरीले उनको साथबाट २ ग्राम ९५० मिलिग्राम खैरो हेरोइन फेला पारी नियन्त्रणमा लिएको छ।
त्यसैगरी धनगढी उपमहानगरपालिका–२ त्रिनगर ब्यारेलमा प्रहरीले छुट्टै कारबाही गरेको छ। संयुक्त रूपमा खटिएको लागूऔषध नियन्त्रण ब्युरो शाखा कार्यालय धनगढी र प्रहरी चौकी त्रिनगरको टोलीले धनगढी–१३ मोहनपुरका ३० वर्षीय रुमन चौधरीलाई पक्राउ गरेको हो। उनको साथबाट ३ ग्राम ७५० मिलिग्राम खैरो हेरोइन बरामद भएको प्रहरीले जनाएको छ।
दुवै घटनाबारे प्रहरीले थप अनुसन्धान जारी राखेको छ।
