राष्ट्रिय स्वतन्त्र पार्टी (रास्वपा) सभापति रवि लामिछाने र तत्कालीन गोर्खा मिडियाका सञ्चालक छविलाल जोशीसँग सम्बन्धित मुद्दाको सुनुवाइका लागि आज उच्च अदालत बुटवलमा पेसी तोकिएको छ।
उच्च अदालत बुटवलका सूचना अधिकारी रामबहादुर कुँवरका अनुसार गत हप्ता लामिछाने पक्षका कानुनी व्यवसायीहरूले निवेदन दिएपछि सुनुवाइ स्थगित भएको थियो। स्थगित भएको सो मुद्दाको आज नयाँ पेसी तोकिएको हो।
बुटवलको सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले सहकारीमा भएको अपचलन प्रकरणमा आफूले बुझाउनु पर्ने रकम दाखिला गरे पनि रुपन्देही जिल्ला अदालतका न्यायाधीश नारायण सापकोटाको इजलासले साउन २६ गते उनको रिहाइ अस्वीकार गरेको थियो।
जिल्ला अदालतको आदेशसँग असन्तुष्ट बनेपछि लामिछानेले भदौ ९ गते उच्च अदालत बुटवलमा निवेदन दर्ता गराएका थिए। आजको सुनुवाइबाट मुद्दा नयाँ मोड लिन सक्ने अनुमान गरिँदैछ।
