काठमाडौँ – राष्ट्रिय स्वतन्त्र पार्टी (रास्वपा) ले आफ्नो स्वास्थ्य विभागलाई केन्द्रदेखि पालिका स्तरसम्म विस्तार गर्ने योजना अघि बढाएको छ।
पार्टीको स्वास्थ्य तथा जनसंख्या विभाग प्रमुख तोसिमा कार्की ले विभागलाई देशभर विस्तार गर्दै नीतिगत कामलाई तीव्रता दिइने बताएकी छन्।
उनका अनुसार अस्पतालहरूमा हुने लामो लाइन, महँगो उपचार सेवा तथा गाउँगाउँमा डाक्टर र स्वास्थ्यकर्मीको अभाव उपचारको कमीका कारण नभई समग्र स्वास्थ्य प्रणालीकै कमजोरीका कारण हो।
यसै सन्दर्भमा रास्वपाले स्वास्थ्य तथा जनसंख्या विभागमार्फत नीतिगत सुधारका काम अघि बढाइरहेको उनले जानकारी दिइन्। स्वास्थ्य नीतिमा आमूल परिवर्तन ल्याउनका लागि विभागमार्फत काम गरिनेछ कार्कीले भनिन्।
विभाग विस्तारका लागि विज्ञहरू तथा दक्ष जनशक्तिको आवश्यकता रहेको भन्दै उनले सबैलाई सहभागी हुन आह्वान गरेकी छन्। उनले डाक्टर, नर्स, स्वास्थ्यकर्मी, जनस्वास्थ्य विज्ञ, स्वास्थ्य प्रविधिका इन्जिनियर तथा व्यवस्थापकहरूलाई विभागमा जोडिन आग्रह गरेकी छन्।
नेपालको स्वास्थ्य क्षेत्र सुधारका लागि सबै क्षेत्रको सहकार्य आवश्यक रहेको उनले उल्लेख गरिन्।
