काठमाडौं — आकर्षक तलबको प्रलोभन देखाउँदै ग्रिस पठाइदिन्छु भन्दै ठगी गरेको आरोपमा एक युवक पक्राउ परेका छन्।
पक्राउ पर्नेमा धादिङ नेत्रावती गाउँपालिका–५ घर भई हाल भक्तपुरको मध्यपुर थिमी नगरपालिका–९ बस्ने २९ वर्षीय सुदिप सापकोटा रहेका छन्। उनले एक व्यक्तिलाई ग्रिस पठाइदिन्छु भन्दै २ लाख ४० हजार रुपैयाँ लिई सम्पर्कविहीन भएका थिए।
पीडितको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले सापकोटालाई काठमाडौं महानगरपालिका–१५ बाट शनिबार पक्राउ गरेको हो।
प्रहरीका अनुसार उनलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौंमा पठाइएको छ।
