म्याग्दी — पर्यटकीय दृष्टिले महत्वपूर्ण मानिने मुस्ताङ जिल्ला राष्ट्रिय राजमार्गसँग जोड्ने बेनी–जोमसोम सडक अवरुद्ध भएको छ।
म्याग्दीको अन्नपूर्ण गाउँपालिका र मुस्ताङको थासाङ गाउँपालिकाको सिमानामा पर्ने घोप्टेभिरमा सुक्खा पहिरो खसेपछि आज बिहानदेखि सवारी आवागमन ठप्प भएको हो।
सडक अवरुद्ध भएपछि सडक विभागको मेसिनरी उपकरण परिचालन गरिएको र पहिरो पन्छाउने प्रयास भइरहेको सप्मा प्रहरी चौकी घाँसाका प्रमुख प्रहरी सहायक निरीक्षक तेजबहादुर कुमालले जानकारी दिए।
सडक अवरोधका कारण मुस्ताङ जिल्लाको सिधा सवारी सम्पर्क टुटेको छ भने पोखरा–जोमसोम हवाई सेवा पनि प्रतिकूल मौसमका कारण बन्द रहेको छ।
सडक बन्द हुँदा मुस्ताङतर्फ जाने तथा फर्कने पर्यटक र स्थानीयवासी प्रभावित भएका छन्। अहिले मुस्ताङ जानेहरू म्याग्दीको काभ्रेबेसीमा र फर्कनेहरू घाँसामा रोकिएका छन्।
सडक यथाशक्य चाँडो खुलाउने प्रयास भइरहेको प्रशासनले जनाएको छ।
