दैलेख – राष्ट्रिय स्वतन्त्र पार्टी (रास्वपा) दैलेख जिल्ला अन्तर्गत डुङ्गेश्वर गाउँपालिकामा पार्टीको पहिलो ऐतिहासिक पालिका समिति गठन गरिएको छ।
डुङ्गेश्वर गाउँपालिकामा आयोजित भेलाबाट तुलसीप्रसाद आचार्यको सभापतित्वमा ११ सदस्यीय समिति चयन गरिएको हो। २०७९ सालको स्थानीय निर्वाचनमा स्वतन्त्र उम्मेदवारका रूपमा वडा अध्यक्ष पदमा प्रतिस्पर्धा गरेका आचार्य रास्वपाका प्रारम्भिक संस्थापक सदस्य समेत हुन्। उहाँ हाल पार्टीको गाउँपालिका तहको सभापतिमा चयन भएका छन्।
समितिको नेतृत्व चयनसँगै अन्य पदाधिकारीहरू यसप्रकार छन्:
उप–सभापति: कलमबहादुर भण्डारी
सचिव: यमबहादुर हमाल
सह–सचिव: रमेश कार्की
कोषाध्यक्ष: गौरी शाही
कार्यक्रममा सहभागी जिल्ला तथा स्थानीय नेताहरूले नवगठित नेतृत्वलाई भव्य स्वागत गर्दै आगामी दिनमा पार्टीलाई जनतासँग जोड्न अहम् भूमिका निर्वाह गर्नुपर्नेमा जोड दिएका थिए।
भेलाका क्रममा पार्टी अध्यक्ष रवि लामिछानेमाथि राज्यले गरिरहेको भनिएको राजनीतिक प्रतिशोधको विरुद्धमा हस्ताक्षर संकलन गरिएको छ।
रास्वपाका स्थानीय कार्यकर्ताहरूले समितिका सम्पूर्ण पदाधिकारीहरूलाई शुभकामना र सफल कार्यकालको बधाई दिँदै गाउँपालिकामा पार्टीको संगठनात्मक संरचना बलियो बनाउने संकल्प व्यक्त गरेका छन्।
