किसानहरूको आर्थिक स्तर उकास्न प्रविधि र वित्तीय साधनहरूको उपयोगमा जोड

 राप्ती गाउँ‘पालिकाका अध्यक्ष प्रकाश विष्टले किसानहरूको आर्थिक सशक्तिकरण र उत्पादनशीलताको वृद्धि गर्न आधुनिक प्रविधि र वित्तीय साधनहरूको उपयोगमा जोड दिनुभएको छ ।

एनएमबि बैंक लिमिटेड र खेती एपको सहकार्यमा शुरु गरिएको डिजिटल प्रविधिमा आधारित बिना धितो एनएमबि खेती कर्जाबारे आयोजित अन्तत्र्रिmया कार्यक्रममा बोल्दै अध्यक्ष विष्टले उक्त योजना किसानहरूको लागि प्रभावकारी हुने बताउनुभयो ।एनएमबि बैंक लिमिटेड र नेपालको डिजिटल कृषि एप खेतीको सहकार्यमा शुरु गरिएको यो कर्जा योजना नेपालमै पहिलो पटक डिजिटल प्रविधिमा आधारित बिनाधितो कर्जा हो । खेती एपका संस्थापक राजीव न्यौपानेका अनुसार किसानहरूले खेती एपको नयाँ विशेषता एनएमबि खेती कर्जाको प्रयोग गरी पाँच मिनेटभित्रै दुई लाख रुपैयाँसम्म बिना धितो कर्जा प्राप्त गर्न सक्नेछन् । यस योजनाको उद्देश्य वित्तीय पहुँचबाट बञ्चित रहेका किसानहरूलाई सहज र झन्झटरहित तरिकाले कर्जा उपलब्ध गराउनु हो ।

किसानहरूले यो कर्जा कृषि बिउ बिजन, कृषिजन्य उपकरण, तथा अन्य आवश्यक सामग्री खरिद गर्न सरल किस्ताबन्दीमा बिना धितो प्राप्त गर्न सक्नेछन् । यस प्रणालीले किसानहरूको डिजिटल कारोबार, खेतीको अवस्था र योगदानको मूल्याङकन गरी कर्जा स्वीकृत गर्ने भएकाले पारदर्शी र विश्वासिलो बनाएको छ । ग्राहकहरूले ३ महिनादेखि २४ महिनासम्मको भुक्तानी अवधिभित्र कर्जा चुक्ता गर्न सक्ने सुविधा पाउनेछन् भने कर्जा चुक्ता गरिसकेपछि पुनः तुरुन्तै अर्को कर्जा लिन सक्नेछन् ।