काठमाडौं — मधेस प्रदेशका पूर्वप्रदेश प्रमुख राजेश झा (अहिराज) बलात्कार अभियोगमा पक्राउ परेका छन् । चार महिनाअघि एक किशोरीले विभिन्न प्रलोभन र आश्वासन दिएर यौन शोषण गरेको आरोप लगाउँदै झाविरुद्ध उजुरी दिएकी थिइन् । उजुरी परेपछि फरार रहेका झालाई आइतबार प्रहरीले पक्राउ गरेको हो ।
पक्राउपछि उनलाई काठमाडौं जिल्ला अदालतमा उपस्थित गराइएको छ । अदालतले झालाई पाँच दिनसम्म थुनामा राखी अनुसन्धान गर्न अनुमति दिएको काठमाडौं उपत्यका प्रहरी कार्यालयका एसएसपी विश्व अधिकारीले जानकारी दिए ।
प्रहरीका अनुसार पीडित किशोरीको बयान र प्रारम्भिक अनुसन्धानका आधारमा झाविरुद्ध गम्भीर आरोप पुष्टि हुने आधार भेटिएको छ । झा मधेस प्रदेशको पहिलो प्रदेश प्रमुखका रूपमा कार्यरत रहेका थिए ।
