कैलालीको लम्की चुहा नगरपालिका–१ लम्कीस्थित टीकापुर रोडमा सञ्चालित एक जुत्ता–चप्पलको गोदाममा शुक्रबार राति भीषण आगलागी भएको छ।
आगलागीमा परि कल्पना जैशीले सञ्चालन गर्दै आएको कल्पना ट्रेडर्स एण्ड सप्लायर्स को गोदाममा रहेका सम्पूर्ण सामान जलेर नष्ट भएका छन्। आगलागीबाट ७० लाख रुपैयाँभन्दा बढीको क्षति भएको इलाका प्रहरी कार्यालय लम्कीले जनाएको छ।
घटनापछि लम्कीचुहा नगरपालिकाको दमकल, प्रहरी टोली र स्थानीयको सहयोगमा आगो नियन्त्रणमा लिइएको इलाका प्रहरी कार्यालय लम्कीका प्रमुख प्रहरी निरीक्षक लोकेन्द्रबहादुर सिंहले जानकारी दिए।
गोदाममा ठूलो परिमाणमा चप्पल र जुत्ता रहेका भए पनि मानवीय क्षति भने नभएको प्रहरीले स्पष्ट गरेको छ।
