नेपालको सुदूरपश्चिम प्रदेश डडेल्धुरा जिल्ला अमरगढी नगरपालिका पोखरा भट्टगाउँमा जन्मिएका वैदिक पुरोहित सुरेश पार्की (सनातनी आर्य) अहिले देशभित्र मात्र होइन, प्रवासका धार्मिक मण्डलीहरूमा पनि एक समर्पित वैदिक आचार्यका रूपमा परिचित हुँदै गएका छन्।
हाल कंचनपुरको कृष्णपुर नगरपालिका–७ निवासी पार्कीले झण्डै सात वर्षदेखि निरन्तर वैदिक कर्ममार्गमा सेवा गर्दै आएका छन्। उनले नेपाल आर्य समाज गुरुकुल टिकापुर–कैलालीबाट व्यवस्थित वैदिक दीक्षा तथा संस्कार–प्रशिक्षण प्राप्त गरेका हुन्।
पार्कीको पुरोहितीय यात्राको विशेषता भनेको जात–पातको भेदभाव तोड्दै दलित र गैरदलित दुबै समुदायका घर–घरमा समान भावले कर्मकाण्ड सञ्चालन गर्नु हो। उनी सोह्र संस्कारदेखि ग्रहशान्ति, नामकरण, यज्ञोपवीत, विवाह, श्राद्ध, रुद्राभिषेक, सत्यनारायण पूजा लगायत सबै प्रकारका वैदिक अनुष्ठानहरू विधिवत रूपमा सञ्चालन गर्दै आएका छन्।
उनका अनुसार वैदिक धर्म सबैका लागि हो। कर्मकाण्डले समाजलाई एकत्व र समानताको सूत्रमा बाँध्छ भन्ने विश्वासले नै उनलाई यस मार्गमा अघि बढ्न प्रेरित गरेको हो।
धार्मिक सहिष्णुता र सामाजिक समरसताको सन्देश दिन सक्ने यस्तो युवा पुरोहित आधुनिक नेपालमा दुर्लभ मानिन्छ। पार्कीको यो कार्यले न केवल आर्य–वैदिक परम्पराको पुनरुत्थान गरिरहेको छ, तर जातीय समता र धार्मिक मानवीयताको अन्तर्राष्ट्रिय सन्देश पनि फैलाइरहेको छ।
हालै विभिन्न अन्तर्राष्ट्रिय वैदिक मञ्चहरूले पनि सुरेश पार्कीको योगदानलाई सम्मान र सराहना गर्न थालेका छन् जसले नेपाललाई वैदिक समरसताको आदर्श भूमिका रूपमा प्रस्तुत गरिरहेको छ।
