कञ्चनपुर कारागारबाट कैदी बन्दीहरू भगाउने घटनामा संलग्न रहेको आरोपमा प्रहरीले तीन जनालाई पक्राउ गरेको छ। जेनजी आन्दोलनका क्रममा गत भदौ २४ गते कारागार परिसरमा प्रवेश गरी कैदी बन्दीहरू बाहिर निकाल्ने गतिविधिमा उनीहरू संलग्न रहेको पुष्टि भएपछि नियन्त्रणमा लिइएको जिल्ला प्रहरी कार्यालय कञ्चनपुरले जनाएको छ।
जिल्ला प्रहरी कार्यालय कञ्चनपुरका प्रमुख प्रहरी उपरीक्षक खड्कबहादुर खत्रीका अनुसार कारागार प्रशासनलाई चुनौती दिँदै कैदीहरू बाहिर निकाल्ने कार्यमा संलग्न रहेको प्रमाण फेला परेपछि तीन जनालाई पक्राउ गरी थप अनुसन्धान भइरहेको छ। अनुसन्धानकै क्रममा रहेकाले पक्राउ परेकाहरूको परिचय हाल गोप्य राखिएको प्रहरीले जनाएको छ।
पक्राउ परेकाहरूको बयानका आधारमा घटनामा संलग्न अन्य व्यक्तिहरूको खोजी कार्य पनि तीव्र पारिएको छ। भदौ २४ गते भएको घटनामा संलग्न सबैको पहिचान र पक्राउका लागि अनुसन्धान जारी छ प्रहरी उपरीक्षक खत्रीले बताए।
प्रहरीका अनुसार पक्राउ परेका तीनै जनालाई जिल्ला अदालत कञ्चनपुरमा पेस गर्ने प्रक्रिया अघि बढाइएको छ।
गत भदौ २४ गते कञ्चनपुर कारागारबाट ३५७ जना कैदी बन्दी बाहिर निस्किएका थिए। तीमध्ये २९४ जना आफैँ कारागार फर्किएका थिए भने ६३ जनालाई प्रहरीले नियन्त्रणमा लिएर पुनः कारागार चलान गरेको थियो। हालसम्म ९८ जना कैदी बन्दी फरार रहेका छन्, जसमध्ये १७ जना छिमेकी मुलुक भारतका नागरिक रहेको प्रहरीले जनाएको छ।
