तोसिमा कार्कीको असन्तुष्टि विस्तारित बैठक नकुरी सचिवालय विस्तार यो नै रिफर्मेसन होइन

राष्ट्रिय स्वतन्त्र पार्टी (रास्वपा)की नेता डा. तोसिमा कार्कीले पार्टीको सचिवालय विस्तारको निर्णयप्रति असन्तुष्टि जनाएकी छन्। सामाजिक सञ्जालमार्फत प्रतिक्रिया जनाउँदै उनले पार्टीमा रिफर्मेसन (सुधार)को एजेन्डा उठिरहेको बेला विस्तारित बैठक नै नबसी सचिवालय विस्तार गर्नु गलत भएको बताएकी हुन्। उनले लेखेकी छन् महाअधिवेशन कहिले गर्ने भन्ने निर्णयका लागि दुई हप्तामा हुन लागेको विस्तारित बैठक नकुरी सचिवालय विस्तार गरियो। हामीले खोजेको रिफर्मेसन यो होइन, कार्यकारी नेतृत्व परिवर्तन र पुनर्गठन हो। शनिबार मात्रै रास्वपाले पार्टी विधानको धारा २६ अनुसार सचिवालयमा चार नयाँ सदस्य थपेको थियो। कार्यवाहक सभापति डीपी अर्यालले सोबिता गौतम, गणेश पराजुली, शिशिर खनाल र हरि ढकाललाई सचिवालय सदस्यमा मनोनीत गरेका हुन्। यससँगै सचिवालय सदस्य संख्या १० बाट बढेर १४ पुगेको छ। डा. तोसिमाले नयाँ र वैकल्पिक शक्तिहरूलाई समेट्नका लागि पदहरू खाली राखिनु पर्नेमा जोड दिँदै सचिवालय विस्तार रोक्न आग्रह गरेकी छन्। उनका अनुसार पदहरू भरिएपछि नयाँ धारका व्यक्तिहरूलाई पार्टीमा ल्याउन कठिन हुन्छ। उनले पार्टीलाई थप लोकतान्त्रिक बनाउनुपर्ने आवश्यकता औंल्याउँदै लेखेकी छन् हामी थप लोकतान्त्रिक हुन जरुरी छ। कार्यशैली सच्याउन जरुरी छ। संगठनका जरा–जराले अपनत्व महसुस गर्न सक्नुपर्छ। यसैबीच उनले कार्तिक १४ र १५ गते चितवनमा हुने केन्द्रीय समितिको विस्तारित बैठकमा भोटिङ अधिकार सुनिश्चित गर्न माग गरेकी छन्। उनले भनिन् भोटिङ राइट्स नदिने भए देशभरबाट चितवनसम्म बोलाएर निर्णयको अधिकार नदिने बैठकको औचित्य छैन। रास्वपाको विधान अनुसार, सभापतिले आफूसहित पदाधिकारी, कोषाध्यक्ष, प्रवक्ता र केन्द्रीय सदस्यहरू मिलाएर २५ जनासम्मको सचिवालय गठन गर्न सक्ने व्यवस्था रहेको छ।