मकवानपुरमा ट्रकको ठक्करबाट वृद्धाको मृत्यु

मकवानपुर — पूर्व–पश्चिम राजमार्गअन्तर्गत मकवानपुरको मनहरी गाउँपालिका–७ निर्मलबस्तिमा आज बिहान ट्रकको ठक्करबाट एक वृद्धाको मृत्यु भएको छ।

चितवनबाट हेटौँडा आउँदै गरेको ना ८ ख १२५६ नम्बरको ट्रकले स्थानीय ८४ वर्षीया ईन्द्रकुमारी स्याङतानलाई ठक्कर दिएको थियो। ठक्करबाट गम्भीर घाइते भएकी स्याङतानलाई उपचारका लागि हेटौँडा अस्पताल लगिएको भए पनि उपचारको क्रममा उनको मृत्यु भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक पुष्कर बोगटीले जानकारी दिएका छन्।

प्रहरीले ट्रक चालक धनुषा मिथिला नगरपालिका–६ का २५ वर्षीय सञ्जितकुमार महतोलाई नियन्त्रणमा लिएर घटनाबारे थप अनुसन्धान गरिरहेको जनाएको छ।