निर्वाचन आयोगले प्रतिनिधिसभा सदस्यको निर्वाचनलाई स्वच्छ, निष्पक्ष र मर्यादित बनाउने उद्देश्यसहित निर्वाचन आचारसंहिता लागू गर्ने अन्तिम तयारी गरेको छ। आयोगले आगामी माघ ३ गतेदेखि आचारसंहिता लागू गर्ने तयारी गरिएको जनाएको छ।
आगामी फागुन २१ गतेका लागि तय गरिएको प्रतिनिधिसभा निर्वाचन को हालसम्मको प्रगतिबारे आयोगले प्रधानमन्त्री सुशीला कार्कीलाई जानकारी गराएको छ। आयोगका अनुसार निर्वाचनको तयारी, निर्वाचन सामग्रीको छपाइ, जनशक्ति व्यवस्थापनलगायतका विषयमा विस्तृत जानकारी प्रधानमन्त्रीलाई दिइएको हो।
निर्वाचन आयोगका प्रवक्ता नारायणप्रसाद भट्टराईका अनुसार आयोगका तर्फबाट कार्यवाहक प्रमुख निर्वाचन आयुक्त रामप्रसाद भण्डारीले शुक्रबार प्रधानमन्त्रीलाई निर्वाचनसम्बन्धी हालसम्म भएका तयारीका कामबारे ब्रिफिङ गरेका थिए।
आचारसंहितामा निर्वाचनलाई स्वच्छ बनाउन सरकारी तथा गैरसरकारी निकायले गर्न पाउने र नपाउने गतिविधि, राजनीतिक दल तथा सरोकारवालाको भूमिका र जिम्मेवारी स्पष्ट रूपमा उल्लेख गरिएको छ।
आचारसंहितालाई प्रभावकारी रूपमा कार्यान्वयन गर्न सरकार र सरोकारवाला निकायको प्रमुख भूमिका आवश्यक पर्ने आयोगको बुझाइ छ। आयोगले सबै पक्षलाई आचारसंहिता कडाइका साथ पालना गर्न आग्रह गरेको छ।
