काठमाडौं — संघीय मामिला तथा सामान्य प्रशासनमन्त्री राजकुमार गुप्ताले घुस लिएको आरोपपछि पदबाट राजीनामा दिएका छन्।
गुप्ताले सोमबार बिहान सामाजिक सञ्जाल फेसबुकमार्फत स्टाटस लेख्दै राजीनामा दिएको जानकारी दिएका हुन्। उनले आफूमाथि लागेको आरोपको निष्पक्ष छानबिन होस् भन्ने उद्देश्यले राजीनामा दिएको जनाएका छन्।
गुप्ताले लेखेका छन् विगत केही दिनदेखि मेरो नाम घुस डिलसँग जोडेर प्रचारमा आएको छ। कहिलेकाहीँ नखाएको विष पनि लाग्दो रहेछ म अहिले त्यसैको शिकार भएँ। अब लागेका आरोपको सत्य तथ्य बाहिर ल्याउन सहयोग पुगोस् भनेर सम्माननीय प्रधानमन्त्रीसमक्ष राजीनामा दिएको छु।
प्रधानमन्त्री केपी शर्मा ओलीले बिहानै बालुवाटारस्थित निवासमा बोलाएर २४ घण्टाभित्र राजीनामा दिन निर्देशन दिएका थिए। त्यसको केही घण्टामै गुप्ताले पद त्याग गरेका हुन्।
केही दिनअघि मन्त्री गुप्ताको एक अडियो सार्वजनिक भएको थियो जसमा उनले घुस लिएको आशंका गरिएको छ। सार्वजनिक अडियोमा भूमि आयोग कास्कीको अध्यक्ष नियुक्तिसँग सम्बन्धित संवाद रहेको र उनले रकम बुझेको भनिएको छ।
त्यसैगरी अडियोमा पोखराको जग्गा सम्बन्धी छलफल पनि छ जसले मन्त्री गुप्ताले आफ्नो पदको दुरुपयोग गर्दै व्यक्तिगत लाभ उठाएको आशंका बढाएको छ।
गुप्तामाथि विभिन्न क्षेत्रका मालपोत कार्यालयहरूमा फोन गरेर ‘सहयोग माग्ने’ र नभएमा मन्त्रालय सरुवा गरिदिने धम्की दिने आरोप समेत लागेका छन्।
गुप्ता २०८१ असार ३१ गते मन्त्री बनेका थिए। संयोगवश उनले ठीक एक वर्ष पुगेको दिनमा नै राजीनामा दिएका हुन्।राजीनामा पत्रमा उनले आफू प्रविधिको उच्चतम प्रयोगको शिकार भएको दाबी गरेका छन् र अब पार्टीको जिम्मेवारी इमानदारिताका साथ पूरा गर्ने प्रतिवद्धता व्यक्त गरेका छन्।
