बाँके – नक्कली नोट र लागुऔषध अफिमसहित कोहलपुरबाट एक व्यक्ति पक्राउ परेका छन्। पक्राउ पर्नेमा जनगर्जन नेटवर्क प्रा.लि.का अध्यक्ष तथा सञ्चालक मनबहादुर सहकारी देउवा रहेका छन्।
इलाका प्रहरी कार्यालय कोहलपुरका अनुसार मंगलबार विशेष सूचनाका आधारमा जनगर्जन अनलाइनको कार्यालयमा छापा मार्दा देउवाको साथबाट एक हजार दरका ५१ वटा नक्कली नोट तथा १९ किलो ३३५ ग्राम अफिम बरामद गरिएको हो।
कोहलपुरकी डीएसपी लक्ष्मी खनालका अनुसार कार्यालयबाट प्रिन्टर, कम्प्युटर मोनिटर, सिपीयू लगायतका सामग्री पनि बरामद गरिएको छ। अनुसन्धानका क्रममा कार्यालयका अर्का एक कर्मचारीलाई पनि नियन्त्रणमा लिइएको थियो तर संलग्नता पुष्टि नभएपछि उनलाई छाड्ने तयारी भएको प्रहरीले जनाएको छ।
प्रहरीले घटनासम्बन्धी थप अनुसन्धान जारी राखेको छ।
