भक्तपुर — भक्तपुरको मध्यपुर थिमी नगरपालिका–८ बोडे सिन्टीटारमा बिहीबार बिहान झुन्डिएको अवस्थामा मृत फेला परेका दुई किशोरी दिदीबहिनी मेनुका कँडेल (१५) र सिर्जना कँडेल (१३) को शव पोस्टमार्टमका लागि काठमाडौं मेडिकल कलेज दुवाकोट पठाइएको छ।
दुवैको शव बिहीबार बिहान ६:४५ बजे चक्रधर प्रजापतिको घरको भुइँतलामा फलामको डन्डीमा नाइनलको डोरीले घाँटीमा पासो लागेको अवस्थामा झुन्डिएको पाइयो। उनीहरू सुर्खेतको पञ्चपुरी नगरपालिका–८ घर भएका हुन्।
प्रहरीका अनुसार मृतक किशोरीहरू करिब १५ दिनअघि मात्रै सो डेरामा बस्न आएका थिए र आफूहरू कलेज पढ्ने बताउँदै कोठा लिएका थिए। तर उनका बाबुआमाले भने ती छोरीहरू करिब तीन साताअघि भारतको मुम्बईस्थित मीरा भाइन्दरबाट हराएको र कसैले होटलमा काम लगाएको आरोप लगाएका छन्।
बाबुआमाले एक अनलाइन टेलिभिजनमा बोल्दै होटल मालिकले सीसीटिभी नभएको स्थानमा काम लगाउने गरेको बताएका थिए। उनीहरूले यो कुरा साउन ५ गतेको अन्तर्वार्तामा बताएका थिए, जुन मितिबाट तीन दिनपछि छोरीहरू मृत अवस्थामा भेटिएका हुन्।
प्रहरीले घटनास्थलको मुचुल्का तयार गरी शव पोस्टमार्टम पठाएको छ। डीएसपी ढुण्डीराज नेउपानेका अनुसार, पोष्टमार्टमपछि मात्र मृत्युको यकिन कारण खुल्नेछ। घटनाबारे अनुसन्धान जारी रहेको जिल्ला प्रहरी परिसर भक्तपुरले जनाएको छ।
