धनुषाको जनकपुरधाममा १५ वर्षीया अञ्जली कुमारी यादवको हत्या अभियोगमा प्रहरीले एक जनालाई पक्राउ गरी सार्वजनिक गरेको छ। पक्राउ परेका व्यक्ति अञ्जलीकी आमा आशा यादवका प्रेमी ३५ वर्षीय रामबाबु साह रहेका छन्।
जनकपुरधाम उपमहानगरपालिका–४, कटैयाचौरीस्थित डेरामा आमासँग बस्दै आएकी अञ्जलीको बुधबार राति खुकुरी प्रहारबाट हत्या भएको थियो। घटनामा अञ्जलीकी आमा आशा यादव र ढल्केवरकी १४ वर्षीया राशा यादव घाइते छन्।
प्रहरीका अनुसार रामबाबु साहले अञ्जलीकी आमासँगको सम्बन्धमा चिसोपन आएको भन्दै रिसको कारण हत्या गरेका हुन्। साहले खुकुरीसहित आशाको डेरामा पुगेर राति ११:३० बजे आक्रमण गरेका थिए।
साह यसअघि श्रीमतीको हत्या अभियोगमा पाँच वर्ष जेल सजाय काटी २०७७ मा रिहा भएका थिए। उनले आशालाई अटो किनिदिए पनि पछि त्यो गाडी आशाले आफ्ना भाइको नाममा नामसारी गरेकी थिइन्, जसले सम्बन्धमा थप दरार ल्याएको बताइएको छ।
अहिले आशा यादवको धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको छ र अवस्था गम्भीर छ। घटना सम्बन्धमा थप अनुसन्धान भइरहेको प्रहरीले जनाएको छ।
