आइतबार बिहान सामाजिक सञ्जालमार्फत भिडियो सन्देश जारी गर्दै मन्त्री गौतमले सरकारलाई अझ प्रभावकारी बनाउँदै जनताका मुद्दा छिटो समाधान गर्न अध्यादेश आवश्यक परेको बताइन्।
काठमाडौँ — कानुनमन्त्री सोबिता गौतम ले सरकारले छद्म उद्देश्य पूर्तिका लागि नभई द्रुत रूपमा काम गर्न अध्यादेश ल्याएको स्पष्ट पारेकी छन्।
उनले भनिन् “यो अध्यादेश कुनै छद्म उद्देश्य पूर्ति गर्नका लागि ल्याइएको होइन। यो राम्रो काम गर्न, छिटो काम गर्न र सरकारलाई अझ प्रभावकारी रूपमा जनताका मुद्दा समाधान गर्नका लागि ल्याइएको हो।”
मन्त्री गौतमले विगतका सरकारले अध्यादेशको दुरुपयोग गरेका उदाहरणहरू रहेको स्वीकार गर्दै यसपटकको सन्दर्भ फरक रहेको दाबी गरिन्। उनका अनुसार अघिल्ला सरकारहरूले स्वार्थ पूरा गर्न अध्यादेश ल्याएर संसद्मा नलगाई खारेज गर्ने अभ्यासका कारण जनस्तरमा अविश्वास बढेको हो।
तर यसपटकको सन्दर्भ फरक छ। यो सरकार काम तीव्र गतिमा गर्न चाहन्छ उनले भनिन्।
सरकारको सिफारिसमा राष्ट्रपतिबाट जारी भएका सबै अध्यादेश संसद्मा पेस गरिने पनि उनले जानकारी दिइन्। सामान्य प्रक्रियाबाट विधेयक पारित गर्दा तीनदेखि चार महिना लाग्न सक्ने भएकाले छिटो र प्रभावकारी कामका लागि अध्यादेश ल्याइएको उनले स्पष्ट पारिन्।
