अमेरिकाले टर्कीको अदाना सहरनजिकै रहेको आफ्नो वाणिज्य दूतावासबाट अतिआवश्यक बाहेकका कर्मचारीलाई बाहिर जान निर्देशन दिएको छ। अंकारास्थित अमेरिकी दूतावासले सुरक्षा जोखिम बढेको भन्दै यस्तो निर्णय गरिएको जनाएको हो।
अमेरिकाले आफ्ना नागरिकलाई पनि दक्षिणपूर्वी टर्की क्षेत्र छोड्न चेतावनी दिएको छ। दूतावासका अनुसार सुरक्षा जोखिमका कारण गैर–आकस्मिक अमेरिकी सरकारी कर्मचारी तथा उनीहरूका परिवारलाई सन् २०२६ मार्च ९ पछि वाणिज्य दूतावास छोड्न आदेश दिइएको हो।
फेब्रुअरी २८ देखि अमेरिका–इजरायल र इरानबीच बढ्दो सैन्य तनावपछि क्षेत्रीय सुरक्षा अवस्था जटिल बन्दै गएको छ। अमेरिका र इजरायलले आक्रमण सुरु गरेपछि इरानले त्यसको बदलामा क्षेप्यास्त्र र ड्रोन आक्रमण गर्दै आएको बताइएको छ।
टर्कीका विभिन्न सैन्य शिविरमा अमेरिकी सेना तैनाथ भए पनि अहिलेसम्म त्यहाँ प्रत्यक्ष आक्रमण भएको छैन। अदाना सहरबाट करिब १० किलोमिटर टाढा रहेको इन्सर्लिक हवाई अड्डा नेटो सेनाका लागि महत्वपूर्ण सैन्य केन्द्र मानिन्छ र यो दशकौँदेखि अमेरिकी सेनाले प्रयोग गर्दै आएको छ।
यसैबीच, नेटोका सैनिकहरूले इरानबाट टर्कीतर्फ प्रहार गरिएको एक ब्यालेस्टिक क्षेप्यास्त्र रोकेको जनाइएको छ। क्षेत्रीय सुरक्षा जोखिम बढेसँगै नेटोले आफ्नो ‘ब्यालेस्टिक मिसाइल प्रतिरक्षा प्रणाली’ थप सुदृढ बनाएको जनाएको छ।
टर्कीको रक्षा मन्त्रालयले पनि नेटोको रक्षा प्रणालीले इरानबाट प्रहार गरिएको क्षेप्यास्त्रलाई अवरोध गरी निष्क्रिय पारेको जानकारी दिएको छ।
