नेपाल–भारत सीमा कार्यदल (बीडब्लूजी)को सातौँ बैठक मंगलबार भारतको नयाँदिल्लीमा सम्पन्न भएको छ। झन्डै ६ वर्षपछि बीडब्लूजी बैठक बसेको हो।
बैठकमा नेपाली प्रतिनिधिमण्डलको नेतृत्व सर्वेक्षण विभागका महानिर्देशक प्रकाश जोशीले गरेका थिए भने भारतीय पक्षको नेतृत्व भारतका सर्वेक्षक महानिर्देशक हितेशकुमार एस. मकवानाले गरे। बैठक सौहार्दपूर्ण र मैत्रीपूर्ण वातावरणमा सम्पन्न भएको नयाँदिल्लीस्थित नेपाली दूतावासले जनाएको छ।
बैठकमा सन् २०१९ मा देहरादूनमा सम्पन्न छैटौँ बीडब्लूजी बैठक र ११औँ सर्वेक्षण समितिको निर्णय तथा कार्य प्रगतिमाथि समीक्षा गरियो। साथै सीमास्तम्भहरूको निरीक्षण, मर्मत र मर्मतसम्भारका लागि अद्यावधिक मोडालिटी अपनाउने निर्णय लिइएको दूतावासद्वारा जारी विज्ञप्तिमा उल्लेख छ।
बैठकले सीमा व्यवस्थापनलाई प्रभावकारी बनाउन नयाँ प्रविधि तथा उपकरण प्रयोग गर्ने सहमति जनाएको छ। साथै सन् २०२५ अगस्टमा नेपालमा सर्वेक्षण अधिकारी समितिको अर्को बैठक गर्ने र सुविधाजनक मितिमा नेपालमा नै बीडब्लूजीको अर्को बैठक आयोजना गर्ने सहमति पनि दुबै पक्षबीच भएको छ।
बीडब्लूजी सन् २०१४ मा दुवै देशको सहमतिमा सीमास्तम्भ निर्माण, पुनस्र्थापना र मर्मत तथा अन्य प्राविधिक कार्यका लागि गठन गरिएको थियो। तर सन् २०१९ यता कोभिड–१९ महामारी र सीमा विवाद कालापानी, लिपुलेक, लिम्पियाधुरा, सुस्ताका कारण बैठक बस्न सकेको थिएन।
६ वर्षपछि बीडब्लूजी बैठक पुनः सञ्चालनमा आउनुले नेपाल–भारत सीमा व्यवस्थापन प्रक्रियामा सकारात्मक संकेत दिएको छ।
