खोटाङको दिक्तेल रुपाकोट मझुवागढी नगरपालिकाका मेयर तीर्थराज भट्टराईको आमरण अनशनको विषय बुधबार राष्ट्रिय सभामा प्रवेश गरेको छ। नेकपा माओवादी केन्द्रका सांसद गोपीबहादुर अछामी सार्कीले संसद्मा आवाज उठाउँदै मेयर भट्टराईले राखेका मागप्रति सरकार गम्भीर बन्नु आवश्यक रहेको बताएका छन्।
सांसद अछामीका अनुसार मेयर भट्टराईले ७ बुँदे माग राखेका छन् जसमा स्थानीयस्तरमा उत्पादन हुने कच्चा पदार्थको सहज प्रयोग सुनिश्चित गर्नुपर्ने, जलवायु परिवर्तनमा असर गर्ने वस्तुहरूको प्रयोगमा रोक लगाउनुपर्ने, बाँस लगायतका सामग्रीको उपयोगलाई प्राथमिकता दिनुपर्ने, प्लास्टिकजन्य वस्तुको आयातमा प्रतिबन्ध लगाउनुपर्ने, र पहाडमा हुने भूक्षय न्यूनीकरण गर्न सरकारको विशेष ध्यान आवश्यक रहेको उल्लेख गरिएको छ।
उहाँको कुरालाई सुनुवाइ गरियोस् भन्दै सांसद अछामीले मेयरको माग सम्बोधन गर्न सरकारसँग आग्रह गरेका छन्। मेयर भट्टराईले स्थानीय उत्पादन र वातावरणीय संवेदनशीलतालाई प्राथमिकता दिनुपर्ने माग गर्दै आमरण अनशन थालेका हुन्। उनको स्वास्थ्य अवस्था बिग्रँदै गएको जनाइएको छ।
