गाजा क्षेत्रमा इजरायल र हमासबीचको युद्ध अन्त्य गर्न भइरहेको प्रयासलाई हमासले पुनः अस्वीकार गरेको छ। बीबीसीका अनुसार हमासले स्पष्ट रूपमा भनेको छ कि जबसम्म प्यालेस्टाइनलाई सम्प्रभु राष्ट्रको रूपमा मान्यता दिइँदैन, तबसम्म उनीहरूले हतियार नबिसाउने छन्।
अमेरिकी राष्ट्रपति डोनाल्ड ट्रम्पले युद्धविरामको प्रस्ताव राखेका थिए। तर इजरायलले युद्ध रोक्न हमासले हतियार त्याग्नुपर्ने शर्त अघि सारेको छ। इजरायल र हमास दुवै आफ्नो अडानमा कायम रहेकाले हालैको वार्ता बिना निष्कर्ष टुंगिएको हो।
यसअघि केही अरब देशहरूले हमासलाई गाजाको नियन्त्रण छोड्न र हतियार बिसाउन आग्रह गरेका थिए। त्यस्तै फ्रान्स, क्यानडा, बेलायतजस्ता पश्चिमा राष्ट्रहरूले प्यालेस्टाइनलाई एक स्वतन्त्र राष्ट्रको रूपमा मान्यता दिने तयारी गरिरहेका छन्। बेलायतले त इजरायलले आगामी सेप्टेम्बरसम्म कुनै सर्त नमाने त्यसपछि प्यालेस्टाइनलाई देशको मान्यता दिने घोषणा नै गरिसकेको छ।
गाजामा जारी युद्धको समाधानका लागि कूटनीतिक प्रयासहरू तीव्र भइरहेका बेला हमासको यो अडानले द्वन्द्व समाधानमा थप चुनौती थपेको छ।
