बैतडी – पाटन नगरपालिका–८ का वडा अध्यक्ष हरिस बिष्टले आफ्नो जन्मदिनको अवसरमा जनता माध्यमिक विद्यालय आरुबाटामा २५ हजार रुपैयाँ बराबरको वडा अध्यक्ष अक्षयकोष स्थापना गर्दै समाजसेवामा समर्पित भावनाको अनुपम उदाहरण प्रस्तुत गरेका छन्।
विद्यालय व्यवस्थापन समिति अध्यक्ष दिवान सिंह बिष्ट र प्रधानाध्यापक बिर्खराज अवस्थीलाई चेक हस्तान्तरण गर्दै अक्षयकोष स्थापना गरिएको हो। अक्षयकोषबाट प्राप्त ब्याज रकम विद्यालयमा अध्ययनरत गरिब, असहाय, अनाथ तथा टुहुरा बालबालिकालाई छात्रवृत्तिका रूपमा प्रदान गरिनेछ।
वडाध्यक्ष बिष्टले पदभार ग्रहण गरेपछि आफ्नै एक महिनाको पारिश्रमिक यस्ता बालबालिकाहरूका लागि सहयोग स्वरूप छुट्याउने निर्णय गरेका थिए। सानै उमेरदेखि मिलनसार र सामाजिक स्वभावका बिष्ट श्री ज्ञानेश्वर नमुना माध्यमिक विद्यालयका लामो समयदेखि विद्यालय व्यवस्थापन समिति (वि.व्य.स) अध्यक्ष समेत हुन्। उनको सामाजिक योगदान र नेतृत्व क्षमताले वडामा शिक्षा, स्वास्थ्य र सहायताका क्षेत्रमा उल्लेखनीय काम भएको स्थानीयहरूको भनाइ छ।
बाल्यकालमा कठिन परिस्थितिबाट गुज्रिएका अध्यक्ष बिष्टले कक्षा ३ मा बुबाको र स्नातक सुरु गर्दा जेठो दाजुको निधन भएपछि पढाइ बीचमै रोक्नु परेको पीडाबाट आफूले महसुस गरेको पीडालाई समाज परिवर्तनमा रूपान्तरण गरेका छन्।
उनी प्रधानमन्त्री पुष्पकमल दाहाल ‘प्रचण्ड’ का निकट सहयोगीको रूपमा समेत चिनिन्छन्। पार्टी राजनीतिसँगै सामाजिक काममा सक्रिय बिष्टले विगतमा पनि विभिन्न विद्यालयहरूमा शैक्षिक सामग्री, छात्रवृत्ति, विपद् पीडितलाई राहत तथा बिरामीहरूको उपचारमा सहयोग गर्दै आएका छन्।
संस्कार शिरोमणि पण्डित गणेशप्रसाद पन्तले दैलेख कर्णाली टेलिभिजनसँग कुराकानी गर्दै भने मेरो पुरानो क्लासफ्रेन्ड हरिसले समाजको लागि गरेको यो कार्य देखेर म अत्यन्त खुसी छु। उनले बालबालिकालाई लक्षित गरी गरेको अक्षयकोष स्थापनाले समाजमा सकारात्मक सन्देश दिएको छ।
अध्यक्ष बिष्टले आगामी वर्षमा अर्को विद्यालयमा पनि यस्तै अक्षयकोष स्थापना गर्ने योजना बनाएको बताएका छन्। समाजसेवामा निष्ठापूर्वक लागिरहेकै कारण उनले समुदायमा समर्पित, जिम्मेवार र नेतृत्वदायी जनप्रतिनिधिको छवि बनाउन सफल भएका छन्।
