गुल्मी — जिल्लाको रेसुङ्गा नगरपालिका–७ उनाएचौरमा १३२ केभी क्षमताको सबस्टेशन निर्माण सम्पन्न भई सञ्चालनमा आए पनि इस्मा गाउँपालिका–१ र २ का हस्तिचौर क्षेत्रमा भने विद्युत आपूर्ति समस्या जस्ताको तस्तै रहेको छ।
पहिले बुटवलस्थित सबस्टेशनमार्फत गुल्मीमा विद्युत आपूर्ति हुँदै आएकोमा लामो दूरीका कारण पटक–पटक समस्या हुने गर्थ्यो। दीर्घकालीन समाधानका लागि करोडौं लगानीमा उनाएचौर सबस्टेशन निर्माण गरी गत वर्षदेखि सञ्चालनमा ल्याइए पनि हस्तिचौर क्षेत्रमा भने अपेक्षित सुधार देखिएको छैन।
स्थानीयवासीहरूले अझै पनि घण्टौंसम्म बत्ती नआउने, आएको बेला पनि कम भोल्टेजका कारण विद्युत उपकरणमा क्षति हुने गुनासो गरेका छन्। सबस्टेशन गाउँ नजिकै बनेपनि पर्याप्त आपूर्ति नहुँदा व्यापार–व्यवसायदेखि लिफ्ट खानेपानी योजनासम्म प्रभावित भएको स्थानीयले बताएका छन्।
छल्दीटारी खानेपानी उपभोक्ता समितिका अध्यक्ष यमबहादुर थापाले विद्युत् अनियमितताका कारण लिफ्ट खानेपानी वितरणमा समस्या हुने गरेको बताए। उनका अनुसार विशेषगरी वर्षायाममा विद्युत् झन् बढी अव्यवस्थित हुने गरेको छ।
नेपाल विद्युत प्राधिकरण गुल्मी वितरण केन्द्रका अनुसार सबस्टेशन सञ्चालनमा आए पनि सामुदायिक प्रणालीमार्फत वितरण हुने क्षेत्रमा समस्या कायमै रहेको छ। नियमित आपूर्ति नहुँदा वडास्तरीय काममा समेत असर परेको प्राधिकरणले जनाएको छ।
स्थानीय राजन कुँवरका अनुसार १० मिटर परै केन्द्रीय प्रणालीबाट आपूर्ति हुने क्षेत्रमा २४ सै घण्टा बत्ती रहे पनि सामुदायिक क्षेत्रमा नागरिकलाई अन्धकारमा बस्नुपर्ने बाध्यता वर्षौंदेखि छ। समस्या समाधानमा सम्बन्धित निकायले चासो नदेखाए स्थानीयवासी आन्दोलनमा उत्रिने चेतावनीसमेत दिएका छन्।
