कैलाली — प्रहरीले ५ किलो ६९० ग्राम चरेस र ४ ग्राम ९० मिलिग्राम खैरो हेरोइनसहित पाँच जनालाई पक्राउ गरेको छ। शुक्रबार धनगढी उप–महानगरपालिका–२ त्रिनगर, मिलनचोक र जुगेडासहित विभिन्न स्थानबाट उनीहरूलाई नियन्त्रणमा लिइएको हो।
लागूऔषध ब्युरो शाखा धनगढी, वडा प्रहरी कार्यालय धनगढी र प्रहरी चौकी त्रिनगरको संयुक्त टोलीले मोटरसाइकल चेकजाँचका क्रममा गोदावरी नगरपालिका–१ बस्दै आएका वीर बहादुर रावलको साथबाट २ ग्राम ७६० मिलिग्राम खैरो हेरोइन बरामद गरेको जिल्ला प्रहरी कार्यालय कैलालीले जनाएको छ।
त्यसैगरी, चुरे गाउँपालिका–३ का मोहन मल्लको मोबाइल खोलभित्र लुकाइएका ५९० मिलिग्राम हेरोइन बरामद भएको प्रहरीले जनाएको छ। यस्तै, धनगढी–२ मिलनचोकस्थित जयराम होटल सञ्चालन गर्दै आएका बझाङ बुङ्गल नगरपालिका–८ का राम बोहराको होटलमा गरिएको चेकजाँचमा ५ किलो ६९० ग्राम चरेस भेटिएको हो।
साथै, धनगढी–१२ जुगेडाबाट मोटरसाइकल चालक विजय बिक र पछाडि सवार प्रदीप रानाको साथबाट ७४० मिलिग्राम हेरोइन बरामद गरिएको छ।
पक्राउ परेकामाथि थप अनुसन्धान भइरहेको जिल्ला प्रहरी कार्यालय कैलालीले जनाएको छ।
