काठमाडौं – सामाजिक सञ्जाल बन्द र शासकीय अव्यवस्थाविरुद्ध सुरु भएको जेनजी आन्दोलन हिंसात्मक बन्दै गएको छ । अहिलेसम्म दुई जनाको मृत्यु भइसकेको छ ।
प्रहरीको गोली लागेर निजामती अस्पतालमा एक जनाको मृत्यु भएको छ भने करिब एक सयभन्दा बढी घाइतेको त्यहाँ उपचार भइरहेको छ । वीर अस्पतालको ट्रमा सेन्टरमा मात्र ३० जना घाइते छन् जसमा केहीको अवस्था गम्भीर छ ।
बानेश्वर क्षेत्रमा प्रदर्शनकारीले प्रहरीसँग तीव्र प्रतिकार गरेपछि प्रहरीले अन्धाधुन्ध अश्रुग्यास प्रहार गरेको छ । स्थिति नियन्त्रणबाहिर गएपछि आज मध्यान्ह १२ बजेदेखि राति १० बजेसम्म सिंहदरबार, राष्ट्रपति निवास आसपाससहित बानेश्वर क्षेत्रमा कर्फ्यू आदेश जारी गरिएको छ ।
तर कर्फ्यू अवज्ञा गर्दै आन्दोलनकारीले प्रदर्शन जारी राखेपछि प्रहरीले थप बल प्रयोग गर्दै दमन गरेको छ ।
