काठमाडौं – राष्ट्रिय स्वतन्त्र पार्टी (रास्वपा) का सबै सांसदले पदबाट राजीनामा दिने भएका छन्। मंगलबार बसेको संसदीय दलको बैठकले यसबारे औपचारिक निर्णय लिने तयारी गरेको एक सांसदले जानकारी दिएका छन्।
विकसित घटनाक्रमलाई ध्यानमा राखेर सबै सांसदले राजीनामा गर्ने तयारी गरेका हौं उनले भने। प्रवक्ता मनिष झाले बैठक सुरु भएको पुष्टि गरेका छन्।
सहकारी ठगी मुद्दामा पूर्पक्षका लागि थुनामा रहेका रास्वपा सभापति रवि लामिछानेले सोमबार साँझ आफ्ना सांसदलाई राजीनामा गर्न तयार रहन निर्देशन दिएका थिए।
सोमबारको जेनजी युवाहरूको प्रदर्शनमा प्रहरीले गोली चलाउँदा १९ जनाको मृत्यु भएपछि राजनीतिक संकट चुलिएको छ। सामाजिक सञ्जाल बन्द र शासकीय अव्यवस्थाको विरोधमा सुरु भएको प्रदर्शनमा दमनपछि स्थिति नियन्त्रणबाहिर गएको हो।
रास्वपाले युवाहरूको आन्दोलनमा ऐक्यबद्धता जनाउँदै सरकारविरुद्ध कडा प्रतिवाद गर्दै आएको छ। मंगलबार पनि देशभर प्रदर्शन जारी छ जसमा संसद् विघटन र प्रधानमन्त्री केपी शर्मा ओलीको राजीनामाको माग प्रमुख रूपमा उठाइएको छ।
प्रतिनिधिसभामा रास्वपाका २१ सांसद छन्। तीमध्ये सांसद असिम शाहले यसअघि नै राजीनामा घोषणा गरिसकेका छन्।
