जेनजी आन्दोलनका क्रममा भएको आगजनी र तोडफोडमा संलग्न रहेको प्रमाण सार्वजनिक भएपछि राष्ट्रिय स्वतन्त्र पार्टी (रास्वपा) पनौती नगर सभापति विवेक भट्टराई र वडा इन्चार्ज सुदर्शन तिमल्सिनाले पार्टी परित्याग गरेका छन्।
भदौ २४ गते पनौती नगरपालिकाभित्र निजी तथा सरकारी सम्पत्तिमा आगजनी र तोडफोड हुँदा पूर्व मेयर भीम न्यौपाने, उपमेयर गीता बन्जारा, कांग्रेस नेता शिव हुमागाईँ र व्यवसायी क्याप्टेन रामेश्वर थापाको घरमा क्षति पुगेको थियो।
भिडिओ र फोटोमार्फत प्रत्यक्ष संलग्नता प्रमाणित भएपछि भट्टराई र तिमल्सिनाले गल्ती स्वीकार गर्दै पार्टी छाडेका हुन्। तोडफोड र आगजनीको नेतृत्व उनीहरूले नै गरेको बताइएको छ।
नगर सभापति भट्टराई कुप्स विद्यालय (काठमाडौँ विश्वविद्यालय) का स्थायी शिक्षक समेत रहेका छन्। विद्यालयले उनको शिक्षक पद पुष्टि गरेको छ। यस्तै पनौती–२ कुशादेवीका तिमल्सिनाले आन्दोलनमा कमजोरी भएको स्वीकार गर्दै राजनीतिबाट अलग हुने घोषणा गरेका छन्।
