अपी हिमाल क्षेत्रमा रहेको ६,३९६ मिटर उचाइको ल्याह्युल पिक (भभया हिमाल) मा पहिलो पटक सफल आरोहण भएको छ। अपिहिमाल गाउँपालिकाका अनुसार बिहीबार व्यावसायिक माउन्टेन गाइड तालिममा सहभागी प्रशिक्षक तथा प्रशिक्षार्थीहरूको सात सदस्यीय टोलीले सफल आरोहण गरेको हो।
गाउँपालिका अध्यक्ष भक्तसिंह ठेकरे बोहराका अनुसार आरोहण गर्ने टोलीमा प्रशिक्षक लालबहादुर जिरेल, रामकाजी तिवारी, राकेशराज तामाङ तथा प्रशिक्षार्थी सूर्यमान तामाङ, सुरज तामाङ, भीषण योन्जन र डाली शेर्पा रहेका छन्।
अपी हिमाल (७,१३१ मिटर) लाई पर्यटनको आकर्षण बनाउन गाउँपालिकाको समन्वयमा गाइड तालिम सञ्चालन गरिएको हो। अध्यक्ष ठेकरेले अपी हिमाल क्षेत्रको दायाँपट्टि रहेको भभया हिमाल आरोहणले यस क्षेत्रको पर्यटन सम्भावना अझ प्रष्ट भएको बताए। उनका अनुसार पदमार्ग निर्माण, पर्यटन आवास गृह तथा अन्य पूर्वाधार विकासका काम विभिन्न निकायहरूको सहकार्यमा भइरहेको छ।
यसअघि संघीय सरकारले सुदूरपश्चिम र कर्णालीका ९७ हिमाललाई आगामी दुई वर्षका लागि शुल्क मुक्त गर्दै आरोहण खुला गर्ने निर्णय गरेको थियो।
