बैतडी – बैतडी जिल्लाका धार्मिक महत्वका स्थलहरूमा यस वर्षको असोज नवरात्रि पर्व विशेष पूजा–अर्चनासहित सुरु भएका छन्।
दशरथचन्द नगरपालिका–४ देवलहाटस्थित पञ्चदेव शिवधाम सप्तदेवल मन्दिरमा प्रत्येक वर्षझैं यसपालि पनि घटस्थापना देखि पञ्चमीसम्म बेलुकी ५ बजे पूजा हुने भएको छ। त्यस्तै हरेक संक्रान्ति र पूर्णिमाका दिन बिहान ८ बजे विशेष पूजा आयोजना हुने मन्दिर परिवारले जनाएको छ। व्यवस्थापन पक्षले भक्तजनलाई समयमा उपस्थित भई पूजामा सहभागी हुन आग्रह गरेको छ।
यसैगरी बैतडीकै जगपति जगन्नाथ बाबा मन्दिरमा पनि नवरात्रि विशेष पूजा सुरु भएको छ। समितिका अनुसार घटस्थापना दिउँसो २ बजे गरिएको छ भने सो दिनदेखि अष्टमीसम्म निरन्तर पूजा सञ्चालन हुनेछ। संक्रान्तिमा दिउँसो २ बजे र पञ्चमीका दिन दिउँसो १२ बजे विशेष पूजा हुने परम्परा छ।
मन्दिरमा वर्षभरि नित्य पूजा भए पनि असोज र चैत नवरात्रि, संक्रान्ति तथा पञ्चमीका दिन विशेष धार्मिक विधि अनुसार पूजा गर्ने परम्परा रहिआएको छ। साथै हरेक वर्ष चारवटा जात सञ्चालन हुने परम्परा पनि रहेको समितिले जनाएको छ।
स्थानीय मात्र नभई छिमेकी जिल्लाबाट समेत ठूलो संख्यामा भक्तजन सहभागी हुने यी मन्दिरहरूमा व्यवस्थापन समितिले सम्पूर्ण भक्तजनलाई पूजामा सहभागी भई धार्मिक पूण्य लाभ लिन आह्वान गरेको छ।
