काठमाडौं – दसैँमा घर फर्कने चहलपहल बढेसँगै घटस्थापना पछिल्ला तीन दिनमै १ लाख ३८ हजार २९६ यात्रु काठमाडौं उपत्यका छाडेका छन्।
काठमाडौं उपत्यका ट्राफिक प्रहरी कार्यालयका अनुसार असोज ६ गते (घटस्थापना)का दिन ४० हजार ९२३, असोज ७ गते ३९ हजार ८१४ र असोज ८ गते ५७ हजार ५५९ यात्रु विभिन्न गन्तव्यतर्फ प्रस्थान गरेका हुन्।
कार्यालयका प्रवक्ता एसपी नरेश सुवेदीका अनुसार अध्ययन, व्यापार व्यवसाय र रोजगारीका सिलसिलामा उपत्यकामा रहेका नागरिक दसैँ मनाउन घरतर्फ लागेका हुन्। यात्रु मुख्यत: थानकोट, साँगा, दक्षिणकाली र बालाजु नाकाबाट गएका छन्।
यसैबीच नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वारले पानीका कारण राजमार्गमा पहिरो खस्दा आवतजावतमा समस्या भएको बताए। उनले मुग्लिङ–नारायणघाट सडकखण्डमा घण्टौँसम्म सवारी रोकिँदा बस समयमा काठमाडौं नआएर यात्रुलाई गन्तव्यमा पठाउन समस्या भएको बताए।
गोँगबुस्थित नयाँ बसपार्कमा पनि यात्रुको भीड बढेको छ। नयाँ बसपार्क सञ्चालन गर्ने लोत्से बहुउद्देश्यीय प्रालिका महाप्रबन्धक सुनिल कुँवरका अनुसार अहिले दैनिक ५०० बस बाहिरिन थालेका छन्, जुन सामान्यतया २५० मात्र हुने गरेको थियो।
यात्रुको सहजताका लागि काठमाडौं उपत्यका ट्राफिक प्रहरी कार्यालयले विभिन्न संघ–संस्थाको सहकार्यमा उपत्यकाका १५ स्थानमा यात्रु सहायता कक्ष स्थापना गरेको जनाएको छ।
