झापा- बिर्तामोड नगरपालिका–६ स्थित गिरीबन्धु टी–ईस्टेट अगाडि आज बिहान भएको सवारी दुर्घटनामा दुई जनाको मृत्यु भएको छ भने १३ जना घाइते भएका छन् ।
विराटनगरबाट काँकडभिट्टातर्फ गइरहेको सगरमाथा यातायातको बस दुर्घटना हुँदा सुनसरी इटहरी नगरपालिका–११ का ४६ वर्षीय दिनेशकुमार भट्टराई र मोरङ रङ्गेली नगरपालिका–२ का ४२ वर्षीय सहचालक राजकुमार चौधरीको मृत्यु भएको जिल्ला प्रहरी कार्यालय झापाका प्रवक्ता खगेन्द्रबहादुर खड्काले जानकारी दिए ।
घाइते १३ जनाको बि एण्ड सी अस्पतालमा उपचार भइरहेको र उनीहरूको अवस्था सामान्य रहेको प्रहरीले जनाएको छ । दुर्घटनापछि बस चालक फरार रहेका छन् भने उनको खोजी कार्य जारी रहेको प्रहरीले जनाएको छ ।
