काठमाडौं – राष्ट्रिय स्वतन्त्र पार्टी (रास्वपा)ले तिहारपछि देशभर सद्भाव यात्रा गर्ने तयारी गरेको छ । पार्टीले हिमाल, पहाड र तराई तीनै भौगोलिक क्षेत्र समेटेर तीन चरणमा यो अभियान सञ्चालन गर्ने भएको हो ।
रास्वपाका प्रवक्ता मनिष झाका अनुसार आज बिहान ११ बजे पार्टी केन्द्रीय कार्यालय, वनस्थलीमा बस्ने सचिवालय बैठकमा यस विषयमा अन्तिम निर्णय लिइनेछ । बैठकले सद्भाव यात्राको मिति र चरणवार कार्यक्रम तय गर्नेछ ।
प्रवक्ता झाका अनुसार हाल समाजमा द्वन्द्व र विभाजनको भावना बढ्दै गएको अवस्थामा राज्य र समाजलाई पुनः जोड्ने उद्देश्यसहित यो यात्रा गर्न लागिएको हो । उनले भने “हामीले गर्न लागेको सद्भाव यात्राको उद्देश्य भनेको मानिसहरूबीचको आपसी सम्बन्ध र विश्वासलाई पुनर्जीवित गर्नु हो । रिस र घृणाभन्दा सद्भाव बढाउन हामी जनतामाझ पुग्नेछौं।”
उनका अनुसार हालको परिस्थितिमा एक पार्टीले अर्को पार्टीप्रति वैमनस्यता राख्ने, छिमेकीको समस्या देख्दा पनि उदासिन रहने प्रवृत्ति मौलाएको छ जसले समाजमा विभाजन ल्याइरहेको छ । त्यसलाई कम गर्न रास्वपाले सद्भाव यात्रा सुरु गर्न लागेको हो ।
सद्भाव यात्राका क्रममा रास्वपाका नेता तथा कार्यकर्ताहरू गाउँ–सहर, चिया चौतारी, क्लब तथा स्थानीय स्थलहरूमा पुगेर नागरिकहरूसँग प्रत्यक्ष संवाद गर्नेछन् । समाज र राज्यबीच सन्तुलन ल्याउने अभियानका रूपमा रास्वपाले यसलाई अगाडि बढाउने तयारी गरेको छ ।
प्रवक्ता झाले थप जानकारी दिँदै भने जेन–जी आन्दोलनले उठाएका विषय हामीले सदनमा उठाएका थियौं, तर संख्याको कारणले धेरै गर्न सकिएन । अब हामी जनता स्वयंमाझ पुगेर संवादमार्फत समाधान खोज्नेछौं ।
