कैलालीमा धानको समर्थन मूल्य कार्यान्वयनका लागि प्रमुख जिल्ला अधिकारी (सिडिओ)को नेतृत्वमा बैठक बसेको छ। शुक्रबार बसेको उक्त बैठकमा विभिन्न राजनीतिक दलका प्रतिनिधि, किसान, र धान खरिद गर्ने व्यापारीहरू सहभागी भएका थिए।
बैठकले खाद्य व्यवस्था तथा व्यापार कम्पनी लिमिटेड धनगढीलाई यथाशीघ्र धान खरिद प्रक्रिया अघि बढाउन अनुरोध गरेको छ। साथै, यस वर्ष कैलाली जिल्लाबाट धान खरिदको परिमाण साबिकभन्दा वृद्धि गरी कम्तीमा ३ लाख क्विन्टलसम्म पुर्याउन आग्रह गरिएको छ।
निर्णयअनुसार खाद्यले कार्तिक ११ गतेभित्र धान खरिद प्रक्रिया सुरु गर्ने व्यवस्था मिलाउने, स्थानीय तहको समन्वयमा आवश्यकता अनुसार थप खरिद केन्द्रहरू सञ्चालन गर्न पहल गर्ने, र नेपाल सरकारले निर्धारण गरेको समर्थन मूल्यको आधारमा धान खरिद–बिक्री गर्न सबै पक्षलाई आग्रह गर्ने निर्णय गरिएको छ।
बैठकले समर्थन मूल्य निर्धारण गर्दा किसान र उपभोक्ता दुबैको हित सुनिश्चित हुने व्यवहारिक मूल्य तय गर्न नेपाल सरकारलाई सुझाव दिने र अन्य राष्ट्रका नीति तथा धान मूल्यको विश्लेषण गरेर दीर्घकालीन नीति बनाउन सिफारिस गर्ने निर्णय पनि गरेको छ।
कैलालीका किसानलाई परम्परागत मोटो धानको सट्टा बजार मागअनुसार मसिनो तथा गुणस्तरीय धान उत्पादनमा प्रोत्साहन गर्न चेतनात्मक कार्यक्रम सञ्चालन गर्न प्रदेश तथा स्थानीय सरकार र सम्बन्धित निकायलाई अनुरोध गरिएको छ।
धान खरिद–बिक्रीको अनुगमनका लागि संघ, प्रदेश, स्थानीय सरकार, किसान र व्यवसायीको संयुक्त समिति गठन गर्ने र सबै खरिद केन्द्रहरूमा मूल्य सूची खुला रूपमा टाँस गर्न अनिवार्य व्यवस्था मिलाउने निर्णय पनि गरिएको छ।
यसैबीच निर्धारित मूल्य कार्यान्वयनको माग गर्दै जिल्ला प्रशासन कार्यालय कैलालीको गेटमा भाइटिकादेखि अनशनरत नेत्र भण्डारीले अनशन अन्त्य गर्ने निर्णय गरेका छन्।बैठकले निर्णयहरूको कार्यान्वयन अवस्थाको समीक्षा गर्न १५ दिनभित्र अर्को बैठक बस्ने जनाएको छ।
हाल कैलालीमा सरकारले निर्धारण गरेको समर्थन मूल्यभन्दा किसानहरू एक हजारदेखि १५ सय रुपैयाँ कममा धान बिक्री गर्न बाध्य भएका छन्। सरकारले यसअघि भदौ २६ गते मोटो धानको मूल्य प्रतिक्विन्टल ३ हजार ४६३ रुपैयाँ ८१ पैसा र मध्यम धानको मूल्य ३ हजार ६२८ रुपैयाँ ३३ पैसा तोकेको थियो।
