दार्चुला – मार्मा गाउँपालिका–३ लटिनाथबाट बजानीतर्फ गइरहेको सु.प्र.प्र.०१–००१ ज १६६२ नम्बरको जीप शुक्रबार बिहान दुर्घटनामा परेको छ।
जिल्ला प्रहरी कार्यालय दार्चुलाका अनुसार जीप सोही गाउँपालिका–३ अन्तर्गत ओखडानी भन्ने स्थानमा दुर्घटना भएको हो। दुर्घटनामा जीपका मालिक करबीरसिंह ठगुन्नाको मृत्यु भएको प्रहरीले पुष्टि गरेको छ।
दुर्घटनाको कारण र जीपमा सवार यात्रुको संख्या हालसम्म खुलेको छैन। जिल्ला प्रहरी कार्यालय दार्चुलाका सूचना अधिकारी बिक्रम बहादुर शाहीका अनुसार जीप सडकबाट झण्डै दुई सय मिटर तल खसेको थियो।
प्रहरी घटनास्थलमा अनुसन्धान सुरु गरेका छन् र थप विवरणहरू सार्वजनिक गरिने जनाइएको छ।
