बैतडीको पाटन नगरपालिका–८ खोड्पे पछिल्लो समय जिल्लाकै उदाहरणीय वडाका रूपमा अघि बढिरहेको छ। वडा कार्यालयका अनुसार सुविधा सम्पन्न वडा भवन निर्माण गरी त्यसमा मिटिङ हल र कर्मचारी निवासको व्यवस्था गरिएको छ। यसले स्थानीय प्रशासनिक सेवा सहज र प्रभावकारी बनेको छ।
स्वास्थ्य क्षेत्रलाई प्राथमिकतामा राख्दै वडामा जिल्लाकै उत्कृष्ट स्वास्थ्य चौकी निर्माण गरिएको छ। चौकीमा अत्याधुनिक ट्रमा सेन्टरसमेत सञ्चालनमा हुने भवन पुर्णतः तयारी छ, कर्मचारी माग को लागि अवस्यक पहल प्रक्रिया अगाडि बढाएको छ जससँगै एम्बुलेन्स सेवा पनि सुचारु गरिएको छ। यसले आकस्मिक बिरामीहरूलाई तत्काल उपचारमा सहयोग पुर्याएको छ।
विजयपुर साठीघाटी, हरि चन्द मोड, विप्या कटाल र खोड्पे शिवालयमा प्रतिक्षालय निर्माण गरिएका छन्। तीमध्ये विजयपुर साठीघाटी, हरिचन्द मोड र विप्या कटालका प्रतिक्षालयहरू सञ्चालनमा आइसकेका छन् भने खोड्पे शिवालयमा यात्रु प्रतिक्षालय निर्माणको तयारी अन्तिम चरणमा पुगेको छ। सोही स्थानमा २० फिट अग्लो ऐतिहासिक शिव मूर्तिको निर्माण कार्य तीव्र गतिमा अघि बढिरहेको छ जसले स्थानीय पर्यटन र सांस्कृतिक आकर्षण बढाउने अपेक्षा गरिएको छ।
कृषि क्षेत्रमा पनि वडाले उल्लेखनीय काम गरेको छ। कृषकहरूलाई उत्पादन सङ्कलन तथा बजार व्यवस्थापन सहज बनाउन कोल्ड स्टोर र सङ्कलन केन्द्र निर्माण भइरहेको छ। त्यस्तै हालसम्म विद्युत् नपुगेका टोलहरूमा विद्युत् वितरण प्रक्रिया सुरु गरिएको छ जसले ग्रामीण बस्तीहरू उज्यालो बनाउने लक्ष्य लिएको छ।
धार्मिक तथा पर्यटन दृष्टिले महत्वपूर्ण श्री ओखलेश्वर धामसम्मको पदमार्ग निर्माण प्रक्रिया पनि अघि बढाइएको छ। वडाभित्रका विभिन्न टोलहरूमा सामुदायिक क्लिनिक घर निर्माण कार्य भइरहेको छ।
सामाजिक सशक्तीकरणतर्फ दलित समुदायका परिवारहरूलाई आइरन तथा मसिन वितरण गरी आत्मनिर्भर बनाउने पहल गरिएको छ। असहाय, विपन्न र टुहुरा बालबालिकाहरूलाई आर्थिक सहयोग प्रदान गरिएको छ। साथै दलित बस्तीमा खानेपानीका योजना सञ्चालनमा छन् र एक घर एक धारा अभियान पनि सशक्त रूपमा अघि बढाइएको छ।
वडाध्यक्ष हरिष बिष्टका अनुसार सबै निर्माण तथा विकास कार्यहरू सरकारी मापदण्ड अनुसार गुणस्तरीय रूपमा सम्पन्न भइरहेका छन्। उनका भनाइमा पाटन–८ लाई आत्मनिर्भर, स्वास्थ्य, शिक्षा र पूर्वाधारमा सम्पन्न वडाका रूपमा स्थापित गर्ने हाम्रो मुख्य लक्ष्य हो।
