डडेल्धुराको आलिताल गाउँपालिका–८ मा शनिबार राति भएको ट्याक्टर दुर्घटनामा एक जनाको मृत्यु भएको छ भने चार जना घाइते भएका छन्। राति करिब १० बजे गोदाम बजारबाट बाहिरीसैनतर्फ जाँदै गरेको भे १ त ७८५४ नम्बरको ट्याक्टर सडकबाट करिब ५ मिटर तल खस्सिएपछि दुर्घटना भएको हो।
दुर्घटनामा गम्भीर घाइते भएका आलिताल–५ बाहिरीसैनका २७ वर्षीय भरत रावतलाई जोगबुढा अस्पताल पुर्याइएको थियो। तर उपचारका क्रममा चिकित्सकले उनलाई मृत घोषणा गरेका छन्।
ट्याक्टरमा चालकसहित पाँच जना सवार थिए। दुर्घटनामा १९ वर्षीय पवन बि.क.,२५ वर्षीय तिलक चोखाल घाइते भई जोगबुढा अस्पतालमा उपचाररत छन्।त्यस्तै २४ वर्षीय सन्तोष रोकालाई थप उपचारका लागि धनगढी रेफर गरिएको जिल्ला प्रहरी कार्यालय डडेल्धुराले जनाएको छ।
दुर्घटनापछि ट्याक्टर चालक २७ वर्षीय योगेन्द्र घर्तीलाई प्रहरीले नियन्त्रणमा लिएर आवश्यक अनुसन्धान अघि बढाएको जनाएको छ।
