कैलाली प्रहरीले शुक्रबार जिल्लाका विभिन्न स्थानमा चेकजाँच गर्ने क्रममा ४ वटा मोटरसाइकलसहित ९ जनालाई लागुऔषधसहित पक्राउ गरेको छ। पक्राउ परेकामध्येबाट प्रहरीले कुल २० ग्राम ६१० मिलिग्राम लागुऔषध बरामद गरेको जिल्ला प्रहरी कार्यालय कैलालीले जनाएको छ।
प्रहरीका अनुसार धनगढी उपमहानगरपालिका-३ त्रिनगर व्यारेनमा चेकजाँच गर्ने क्रममा म २ प ३१०७ नम्बरको मोटरसाइकल चलाइरहेका डडेल्धुराको पर्शुराम-१० का ३५ वर्षीय गणेश बहादुर डाँगी र पछाडि सवार डोटीको जोरायल-२ का २० वर्षीय डम्मरी भण्डारी तथा डडेल्धुराको आलिताल-३ का ३० वर्षीय डम्मर बोहरा को साथबाट ९ ग्राम २९० मिलिग्राम लागुऔषध फेला परेको प्रहरीले जनाएको छ। उनीहरू सवार दुवै मोटरसाइकल प्रहरीले नियन्त्रणमा लिएको छ।
त्यसैगरी भजनी नगरपालिका-३ कुसुमघाटमा चेकजाँच गर्दा सु.प.प्र.०१-००९ प ३५११ नम्बरको मोटरसाइकल चलाइरहेका लम्की-चुहा-१ थकालीपुरका १९ वर्षीय रिजन मगर र पछाडि सवार २२ वर्षीय आकाश चौधरी को साथबाट लागूऔषध बरामद भएको प्रहरीले बताएको छ। चालकले लगाएको हेलमेटभित्र ५ ग्राम ४२० मिलिग्राम लागुऔषध लुकाएको अवस्थामा प्रहरीले फेला पारेको हो। मोटरसाइकलसहित दुबै जनालाई नियन्त्रणमा लिइएको छ।
यस्तै गोदावरी नगरपालिका-५ गेटा क्षेत्रमा गरिएको चेकजाँचका क्रममा से ६ प ७५९४ नम्बरको मोटरसाइकल चलाइरहेका २० वर्षीय विजय बिष्ट र पछाडि सवार बिजौरा-१ का २५ वर्षीय राज चौधरी को साथबाट ५ ग्राम ७५० मिलिग्राम लागुऔषध बरामद गरिएको प्रहरीको जानकारीमा उल्लेख छ। उनीहरूलाई मोटरसाइकलसहित पक्राउ गरिएकाे हो।
त्यसैगरी लम्की-चुहा नगरपालिका-६ पिपरकोटीका २९ वर्षीय कमल जैसी र २६ वर्षीय लक्ष्मण बोहरा लाई नगरपालिकाकै बागमार क्षेत्रबाट पक्राउ गरिएको प्रहरीले जनाएको छ। उनीहरूको साथबाट १५० मिलिग्राम लागुऔषध फेला परेको छ।
जिल्ला प्रहरी कार्यालय कैलालीका अनुसार पक्राउ परेकालाई आवश्यक कानुनी कारबाहीका लागि हिरासतमा राखी थप अनुसन्धान अघि बढाइएको छ।
