बैतडी – पाटन नगरपालिका-८, खोड्पे जसुलीखालीका संस्कारशिरोमणि ज्योतिषाचार्य पण्डित गणेशप्रसाद पन्तले विगत २७ वर्षदेखि दलित बस्तीमा वैदिक विधिअनुसार धार्मिक तथा सांस्कृतिक कर्मकाण्ड गर्दै आएका छन्। जातीय विभेद तथा विभिन्न सामाजिक कुरीति अन्त्य गर्ने उद्देश्यले आफूले दलित बस्तीमा धार्मिक कर्मकाण्ड गर्ने अभियान सञ्चालन गर्दै आएको पन्तले बताएका छन्।
पन्तका अनुसार उनले दलित बस्तीमा सप्ताह, शिवपुराण, लघुरुद्राभिषेक, महारुद्राभिषेक, न्वारन, व्रतबन्ध, विवाह, सत्यनारायण पूजा, ग्रहशान्ति, शतचण्डी, अखण्ड रामायण, स्वस्थानी व्रतकथा, त्रिपिण्डी श्राद्ध, गरुड पुराण, तुलसी मठ निर्माणलगायत विभिन्न धार्मिक कर्मकाण्ड सञ्चालन गरेका छन्।
उनले हालसम्म सयौँ परिवारमा धार्मिक संस्कार सम्पन्न गराएको र विभिन्न समुदायका मानिसलाई धार्मिक संस्कारसँग जोड्ने प्रयास गरेको बताए। यस क्रममा दमाई, कामी, बादी, पोणे, कुमाललगायत शिल्पी समुदायका १ हजार ७६९ जनालाई जनै धारण गराएको तथा ४७६ दलित महिलालाई दुधागो-दोराको धारण गराएको पन्तको दाबी छ।
जिल्लाको प्रसिद्ध श्री वनारसीधाम विश्वनाथ ज्योतिर्लिङ्ग मन्दिरका मूल पुजारीसमेत रहेका पन्तले धर्मग्रन्थमा जात वा लिङ्गका आधारमा विभेद गर्ने व्यवस्था नरहेको बताउँदै समाजमा कायम छाउपडी, जातीय विभेद तथा अन्य कुरीति हटाउन धार्मिक अगुवाहरू सक्रिय हुनुपर्नेमा जोड दिएका छन्।
उनले भने सुदूरपश्चिममा अहिले पनि ब्राह्मणले दलित बस्तीमा गएर न्वारन, विवाह, व्रतबन्धलगायतका कर्मकाण्ड गर्न हिच्किचाउने अवस्था छ। चिहानघाटमा समेत जातीय विभेद हुने गरेको पाइन्छ। यस्ता कुरीति हटाउन म आफैँ अभियानमा लागेको हुँ।
पन्तले दलित समुदायको घरमा धार्मिक कार्य गराउनुका साथै भोजनसमेत ग्रहण गर्दै आएको बताए। दलित समुदायभित्रै पनि एक समुदायले अर्को समुदायको पानी तथा भान्सा नचलाउने अवस्था देखिएको भन्दै उनले त्यस्ता विभेद पनि अन्त्य हुनुपर्ने बताए।
उनका अनुसार कुरीति र जातीय विभेदविरुद्ध अभियान सञ्चालन गरेपछि पुर्ख्यौलीदेखि आफूले कर्मकाण्ड गर्दै आएका ५७५ जना यजमान छुटेका छन्। सामाजिक सञ्जालमार्फत आफूविरुद्ध गालीगलौज तथा आलोचना भए पनि आफ्नो अभियानबाट पछि नहटेको पन्तले बताए।
सामाजिक सञ्जालमार्फत तुच्छ गाली गरे पनि म आफ्नो धर्म र कर्मबाट विचलित भएको छैन उनले भने।
पन्तले प्रत्येक हिन्दूको घरमा वेद, पुराण, शालिग्राम, तुलसीको मठ, शङ्ख-घण्ट तथा पाञ्चायन देवताको स्थापना गराउने योजना रहेको बताए। साथै धार्मिक क्षेत्रहरूमा सबै समुदायका लागि समान र समावेशी पूजा-पाठको व्यवस्था हुनुपर्ने उनको माग छ।
उनले विभेदकारी धार्मिक तथा सामाजिक अभ्यासमाथि पुनर्विचार आवश्यक रहेको बताउँदै धर्मशास्त्रको व्याख्या समयअनुकूल र समानतामूलक हुनुपर्ने धारणा व्यक्त गरेका छन्।
जातीय विभेद तथा सामाजिक कुरीति हटाउन धार्मिक अगुवा र समाजका अगुवाहरूले संयुक्त रूपमा अभियान सञ्चालन गर्नुपर्ने पन्तको भनाइ छ।
धार्मिक कार्य तथा कर्मकाण्डका लागि सम्पर्क:
आचार्य पं. गणेशप्रसाद पन्त
पञ्चाङ्गकार तथा ज्योतिषाचार्य
श्री वनारसीधाम विश्वनाथ ज्योतिर्लिङ्ग मन्दिर पीठाधीश्वर
सम्पर्क नं.: ९८६०२७८१००
